ITheku lixhase amabhizinisi aselokishini ngezenzo ngeDBF
WUTHOBILE ZWANE
OSOMABHIZINI abasafufusa bahlonyiswe ngolwazi lokuthuthukisa amabhizinisi abo embukisweni iSouth Regional Durban Business Fair (iDBF) obuKwaMnyangu Shopping Centre eMlaza, eThekwini, KwaZulu-Natali, ophothulwe izolo.
Kulo mcimbi, oqale mhlaka-24, waphela mhlaka-28 wango-Okthoba, bekukhona amabhizinisi amancane angaphezu kwawu-130 akhangise ngezinto azidayisayo nemisebenzi ayenzayo. Bevile kuka-14 000 abantu abafike kule DBF eneminyaka ewu-26 yasungulwa.
Indikimba yeDBF yalo nyaka ibithi “Regional Fairs Back to Promoting Township Business and Economics“, okusho ukuthi imibukiso ibuyele ekuthuthukiseni amabhizinisi nomnotho wasemalokishini.
FUNDA NALAPHA: https://www.umbele.co.za/2024/10/24/i-south-durban-business-fair-ithuthukisa-umnotho-wasemalokishini/
I-DBF ibinezinhlelo ezihlukene, okubalwa iKiddiepreuner, iFlavours of Durban, iBusiness Indaba ne-International Pavillion.
Usihlalo weKomiti lokuThuthukisa umNotho nokuHLela kuMasipala waseThekwini uMnu uThembo Ntuli uthe lo mbukiso udale amathuba omsebenzi esikhashana awu-70, wacija intsha ngamakhono ebhizinisi.
Esinye wezikhulumi eziqavile uMnu uSbu Leope, odume ngelikaDJ Sbu, nowusomabhizinisi nomsunguli wesiphuzo iMofaya, ululeke wathi noma kuthiwa yimali yokugcina zama akubekhona ozama ukukudayisa, ungabinandaba nokuthi abantu bazothini noma bazokuhleka.
“Musa ukusaba abantu ukuthi bazokuhleka ukuthi udayisa emgwaqweni. Sonke saqala kanjalo ngoba ufuna ukubeka ukudla phezu kwetafula. Leyo mali engena nyanga zonke ungayisebenzisi yonke ngoba enye kufanele uyothenga isitoko futhi bese uzifundisa into yokuphatha imali kahle,” kucebisa yena.
Uthe uma ngokuqhubeka kwesikhathi ibhange liyabona ukuthi imali uyisebenzisa kanjani kukusize mhla ufaka isicelo sokuboleka imali yokusimamisa ibhizinisi.
Uqhube wathi inkinga yabantu wukuthi bayavilapha futhi bayazeya basaba ukuthi abantu bazothini.
“Yekani ukuzibukela phansi ngoba ngiyazi ungakwazi ukwenza le nto (ukwenza ibhizinisi), unamasu amahle. Yeka ukulinda abantu ukuthi bavume amasu akho. Landa abanye abantu ozosebenzisana nabo ukuze uwakhulise. Empilweni sizele ukuzozabalaza. Uyawa, uvuke njengendoda,” kusho uLeope.
Amabhizinisi amancane iKune Kraft, iRambo Brands ne-Izinga Clothing aklonyeliswe ngokubanezindawo zokukhangisa ezihehayo. Ahlabane ngemiklomelo yokuzithuthukisa.
I-marketing and promotions officer eFlam Funeral Services uNksz u-Ayanda Khumalo ithe kubeyinto enhle njengoba bebeqala ukubakulo mbukiso.
“Sikwazile ukufunda okuningi nokuthi amanye amabhizinisi ukuthi asebenza kanjani, sakwazi ukuthola ithuba lokukhuluma emisakaweni ehlukene ngebhizinisi, safunda nokuningi ezinkulumweni zosuku nosuku ebezibakhona ukuthi uwaphatha kanjani amakhasimende,” kusho yena.
Umsunguli we-Amabheshu Innovators, inkampani eyenza izingubo zabesifazane nezabesilisa uMnu uNkazimulo Ngidi uthe: “Ukuba kwami kulo mbukiso kungisize kakhulu ngoba sikwazile ukudayisa izimpahla zethu kakhulu,” kusho yena.