Ukuvikela imvelo nomphakathi akungaxoshi abatshalimali – usihlalo
YINTATHELI YOMBELE
NAKUBA izinhlangano zomphakathi zisithakasele isinqumo seNkantolo yomThethosisekelo sokumisa izinhlelo zeShell zokumba uwoyela ne-gas eWild Coast, eMpumalanga Kapa, kodwa usihlalo wekomiti le-Mineral and Petroleum Resources uthi lesi sinqumo siphazamisa izinhlelo zokudala imisebenzi.
Amajaji eNkantolo yomThethosisekelo anqume ukumisa izinhlelo zeShell zokumba ngenxa yokuthi ayixoxisananga ngokwanele nomphakathi othintekayo. Athe izikhangiso zokuchaza ngalezi zinhlelo zazifakwe emaphepheni esiNgisi kuphela kodwa izakhamuzi zaseWild Coast zikhuluma isiXhosa.
Athe kubalulekile ukuthi uma kuzobanohlelo oluthinta umphakathi kuxoxwe nawo ngokwanele, ngolimi oluzwayo, uchazelwe nokuthi uhlelo oluhlongozwayo luzobanamuphi umphumela emphakathini.
FUNDA NALAPHA: https://www.umbele.co.za/2026/06/24/kuzohlomula-iningizimu-afrika-ngesikhumulo-esisha-selng-kuloba-uzakhele-madela/
Usihlalo wekomiti le-Mineral and Petroleum Resources ePhalamende uMnu uMikateko Mahlaule uthe bayasihlonipha isinqumo senkantolo ngesonto elidlule kodwa bakhathazekile ukuthi siphazamisa izinhlelo zokudala imisebenzi ezweni.
Uthe ukuhamba izinkantolo isikhathi eside akwakhi isithombe esihle kubatshalimali nasembonini yokumba uwoyela ne-gas eNingizimu Afrika engadala inqwaba yemisebenzi uma isisebenza.
“Akufanele izinhlelo zokumba uwoyela ziphele zisaqala, ngoba kufanele sazi ukuthi kunani olwandle ezosilethela abatshalimali, imisebenzi namathuba okukhulisa umnotho wethu. Akufanele ukuvikela imvelo kuncishe abantu imisebenzi,” kusho yena.
UMahlaule uthe ikomiti lizoqhubeka nokuxoxa nomNyango wokuMbiwayo nezamaNdla ukucacisa ngomphumela wesinqumo senkantolo ngezinhlelo zokumba uwoyela.
Khonamanjalo, i-Alternative Information and Development Centre, isikhungo esilwela amalungelo emiphakathi engamelwe muntu, isithakasele isinqumo senkantolo, yathi siwukunqoba kwemiphakathi evikela izindawo zawo.
Ithe amajaji awabukanga kuphela ukuthi uhlelo oluhlongozwayo luzanemali kodwa abheke nomphumela omubi empilweni yabantu neyemvelo.
Lesi sikhungo siphethe ngokuthi isinqumo senkantolo sifuna kubenokubonisana kwangempela phakathi kwabatshalimali nemiphakathi ethintekayo nokuvikela imvelo ngempela, hhayi ngomlomo nje.
I-Shell ayiphawulanga ngalolu daba. UmNyango wokuMbiwayo namaNdla uthe abameli basasifundisisa lesi sinqumo senkantolo.