Intsha engaphezu kwa-40 imi ngomumo ukusungula amabhizinisi ayo

WUNOLWAZI MLOTSHWA

INTSHA engaphezu kwewu-40 yaseMpumalanga isanda kuphothula uhlelo lokuqeqeshelwa ukuqala amabhizinisi i-New Venture Creation Programme.

Lo mcimbi wokuthola izitifiketi ubuseBakgatla Ba Maloka Council Hall ePankop, ngemva kokuphela kohlelo lwezinyanga eziwu-12 lokubambisana phakathi kwePublic Service Sector Education and Training Authority (iPseta) neSmall Enterprise Development & Finance Agency (iSedfa).

FUNDA NALAPHA: https://www.umbele.co.za/2026/08/31/umenzi-kapende-wekhethelo-uhlabane-ngor1-million-kwikasi-sme-national-pitch-challenge/

Lolu hlelo, okuhloswe ngalo ukuthi intsha ingene emabhizinisini, ludidiyele ukuqeqeshwa ekilasini nokufunda umsebenzi ngokuwenza.

Intsha ekade iqeqeshwa ibifakwe emabhizinisini endawo ukuze afunde umsebenzi bukhoma futhi acijwe ngebhizinisi. Uma iseqedile ukuqeqeshwa intsha ithole izitifiketi ezigunyazwe yiServices Seta, kwathi eningi yabhalisa amabhizinisi ayo eCIPC.

Ilungu lePseta Accounting Authority Board uNks uThulile Khumalo lincome izitshudeni ngokuphothula uhlelo lokuqeqeshwa.

Omunye wentsha ewu-49 uMnu uKatlego Pule, waseNokaneng, uthe:  “Ekuqaleni bengingaqondi ukuthi kwenzekani kuloku kuqeqeshwa. Kodwa ngemva kokusungula ibhizinisi ngo-2020, bengifuna ukuliphatha ngendlela efanele. Lolu hlelo lusivulele iminyango emkhakheni wamabhizinisi.”

Isikhulu esiphezulu sePseta uNks uBontle Lerumo sigcizelele ukubaluleka kokukwazi ukushintsha nokuqhubeka nokufunda. “Ikusasa ngelabantu abakwazi ukucabanga ngokujula, ukuhlale beshintsha nokusebenza ngobuchwepheshe. Intsha kufanele ivuleleke ukufunda nokuthola amakhono anjengokuhlaziya imininingwane, ukusebenzisa ubuchwepheshe nokuxazulula izinkinga,” kusho yena.

Ukuqinisekisa ukuqhubeka ukusiza laba osomabhizinisi abasafufusa, igatsha laseWitbank leSedfa lizoqhubeka nokubalekelela ngokuthobela imithetho yamabhizinisi, ukubhalisa amabhizinisi, ukubhenka, ukuthola usizo lwezimali nezinzisakusebenza.

_{Lolu daba luqale lwashicilelwa ku: www.vutivibusiness.co.za}