UMasipala waseThekwini utshale uR43 million ezimotweni zokuqoqa udoti
YINTATHELI KAMASIPALA
UMASIPALA waseThekwini usuzoqoqa udoti ngezomoto ezintsha ezibiza uR43 million kuleli dolobha. Lezi zimoto zokuqoqa udoti nezisiza ukuhlanza zithulwe ngokusemthethweni izolo yimeya kaMasipala waseThekwini uMnu uCyril Xaba. Uzichaze njengesibophezelo sikamasipala ukuqinisekisa ukuthi abantu baseThekwini baqoqelwa udoti yizimoto ezisesimweni esifanele.
Ezimotweni eziwu-18 ezithuliwe kukhona amaloli okuthutha udoti amakhulu namancane, ashanyelayo namaveni amancane.
UXaba uthe amaloli amasha azotshalwa kulo lonke iTheku ukuze uphiko iWaste Management Directorate luzoqinisekisa ukuthi ukuqoqa udoti kungaphazamiseki uma kukhona amaloli amadala ayolungiswa. Kuzobanamaloli ashanyelayo azoqinisekisa ukuthi imigwaqo yaseThekwini ihlanzekile.
FUNDA NALAPHA: https://www.umbele.co.za/2026/07/09/asimile-siyaqhuba-iminyaka-emihlanu-yokwenza-izindawo-ezihlanzekile-ezisimeme-ethekwini/
Ukuthengwa kwamaloli kuhambisana nezinhlelo zikamasipala i-Metro Trading Services Reform Improvement Plan, ezithulwe wumgcinimafa komasipala ukuqinisekisa ukuthi ukuhambisa izinsiza kubantu kuhamba kahle. EThekwini la maloli azoqinisekisa ukuthi uphiko lokuqoqa udoti luhambisana nesikhathi samanje, lusebenzisa imishini nezinsiza ezinobuchwepheshe futhi ezonga imali.
UXaba uthe ngokuthenga amaloli kukhombisa ukuthi abagcini nje ngokukhuluma ngezinhlelo ze-Metro Trading Services Reform Improvement Plan kodwa bayazenza.
Uthe bazimisele ukutshala imali ukuqinisekisa ukuthi umasipala uhlanzekile, unempilo futhi unedolobha ekuhlalekayo kulona.
“Ukuthenga lezi zinsiza zokuthutha udoti kukhombisa ukuzibophezela kukamasipala ukuhambisa izinsiza kubantu. Izimoto ezisesimweni ziqinisekisa ukuthi amathimba ethu ayashesha ukuqoqa udoti, akhuculula izindawo zomphakathi ukuze wonke umuntu ahlale endaweni ehlanzekile,” kusho yena.
Uthe ukutshala imali ezoqinisekisa ukuthi izimoto zokuqoqa udoti zihambisana nesikhathi samanje kuhambisana nezidingo zedolobha elikhula ngesivinini.
“Njengoba idolobha laseThekwini liqhubeka nokukhula nabantu ziyanda izinsiza abazifuna kumasipala. Izimoto ezintsha zizoqinisekisa ukuthi umsebenzi awuphazamiseki ngoba ezindala zibuye zife. Ukutshala le mali kuphucula impilo yezakhamuzi zethu futhi kwakha idolobha esiziqhenya ngalo sonke,” kuphetha uXaba.