Inkantolo ichithe izinkampani ezivalwe yiTransnet ukusebenza nayo
YINTATHELI YOMBELE
IZINKAMPANI ezafakwa ohlwini lwezinnkampani ezimisiwe ukusebenza neTransnet Port Terminals (iTPT) zichayile enkantolo ngemva kokuchitha isicelo sazo sokubuyiselwa emsebenzini.
Lezi zinkampani eziyisikhombisa zafakwa ohlwini lwezinkampani okungafanele zisebenzisane neTPT ngemva kophenyo lwenkohlakalo obelwenziwa yiSpecial Investigating Unit (iSIU).
I-TPT ithe lezi zinkampani zamiswa wumGcinimafa esebenzisana nayo ngemva kophenyo olunzulu lweSIU, olwathola ukuthi kunemithetho ebingalandelwa kahle uma lezi zinkampani eziyisikhombisa zithola umsebenzi. Kwatholakala ukuthi kukhona inkohlakalo, ukuntshontsha izimpahla zenkampani, ukusebenzisana ukufaka imininingwane ezovuna zona, ukugwaza nokuthumela imininingwane engamanga.
FUNDA NALAPHA: https://www.umbele.co.za/2024/08/14/umthetho-wokuhweba-nohulumeni-uyashintsha/
NgoLwesihlanu, isikhulu esiphezulu seTPT uMnu uJabu Mdaki sithe basibonile isinqumo esikhishwe yiNkantolo eNkulu yaseThekwini echithe izinkampani ebezifuna udaba lokumiswa kwazo lulalelwe masisha.
Uthe zamiswa ngemva kophenyo kanti kwagcina sekuxoshwa nezisebenzi zeTPT eziwu-46 kanti nophenyo lusaqhubeka. “Asikudingi ukukhwabanisa, inkohlakalo nokweba eTPT. Ngeke sivume ukuxhashazwa wosonkontileka nezisebenzi. Ukusifaka enkantolo ngeke kusivimbe ukuthi senze okufanele ukuqinisekisa ukuthi siphethe kahle,” kusho yena.
UMdaki uthe iTransnet izibophezele ukulandela imithetho yokuphatha, ukuthi abenza umsebenzi baziphendulele ngezinqumo abazithathayo nangokuthenga izimpahla. Uthe bayasebenzisana nezinhlaka zomthetho njengoba uphenyo luqhubeka futhi bazokubeka obala konke okwenzekayo.