Sehle ngo-1.3% isibalo sabangasebenzi ngekota yesithathu – iStats SA

YINTATHELI YOMBELE

KULOKOZA inhlansi yethemba ngokuqashwa kwabantu eNingizimu Afrika njengoba umbiko omusha weStatistics South Africa (iStats SA) uveza ukuthi sehle ngo-1.3% isibalo sabangasebenzi ezweni, sabawu-31.9%. 

Loku kusho ukuthi bawu-248 000 abantu abathole umsebenzi ngekota yesithathu nokususe isibalo sabangasebenzi ku-33.2%. 

I-Stats SA ithe isibalo sabantu abasebenzayo sesiwu-17.1 million, kuthi esabangasebenzi sibewu-8m.

Abantu asebelahlekelwe yithemba lokuthola umsebenzi banyuke ngo-36 000, okusho ukuthi sebewu-3.5m.

FUNDA NALAPHA: https://www.umbele.co.za/2025/03/26/sinyuke-ngo-12-000-isibalo-sabantu-abasebenzayo-istats-sa/

Okhulumela umfelandawonye wezinyunyana iCosatu ePhalamende uMnu uMatthew Parks uthe bayakuthakasela ukwehla kwesibalo sabantu abangasebenzi kodwa mkhulu umsebenzi ofanele wenziwe ukuze abantu abawu-8m abangasebenzi baqashwe.

Ubalule ukuthi njengoba namhlanje ungqongqoshe womNyango weziMali uMnu u-Enoch Godongwana ezothula iSabelomali samaphakathi nonyaka bafuna ukuzwa ukuthi imisebenzi uzoyidala kanjani. 

Unxuse imboni ezimele ukuthi ifake imali ezweni ukuze izimboni zokukhiqiza, ezolimo nezinye ezidala inqwaba yemisebenzi zizokwazi ukuqasha izakhamuzi. Uyisole ngokuhlala nezigidigidi zemali okufanele ukuthi ziyitshale emnothweni.