Izisebenzi zemboni kashukela zibuyela emsebenzini
YINTATHELI YOMBELE
ISITELEKA sezisebenzi zemboni kashukela eNingizimu Afrika sesiphelile ngemuva kokuthi abamele izisebenzi nabaqashi bevumelene ngokunyusea imiholo ngo-6%.
Loku kwenzeke ngemva kokuthi ungqongqoshe womNyango wezoLimo KwaZulu-Natali uNkk uThembeni KaMadlopha-Mthethwa ebebize abaqashi nezinyunyana zezisebenzi ukuthi baphinde bahlale phansi ukuze kutholakale isisombululo.
FUNDA NALAPHA: https://www.umbele.co.za/2026/08/25/isiteleka-semboni-kashukela-ezweni-siyaqhubeka/
Izingxoxo beziqale ngomhlaka-1 kule nyanga KwaShukela eMount Edgecombe, eThekwini, ngemuva kokuthi izinhlangothi zifike kwangqingetshe izinsuku eziwu-18. Ngomhlaka-8 kule nyanga kubenesivumelwano esicabe indlela yokuthi izisebenzi zibuyele emsebenzini, kwavulwa izigayo eKZN naseMpumalanga.
Isivumelwano esisayinwe ngaphansi kweBargaining Unit yeNational Bargaining Council for the Sugar Manufacturing and Refining Industry sithinta zonke izisebenzi ezikulesi sigcawu.
Ngokwalesi sivumelwano, izisebenzi zizonyuselwa imiholo ngo-6% kuhlehla kusukela ngomhlaka-1 ku-Ephreli, zikhokhelwe izinsuku eziyisithupha zesikhathi zitelekile kanti izinhlangothi zivumelene nokuqhubeka nokuxoxisana ngezimo zokusebenza.
UKaMadlopha-Mthethwa uthe uyathokoza ngalesi sisombululo. “Ngabona ukuthi ezolimo zidinga ukuthi yonke imikhakha ihlale phansi ithole isisombululo esinokuthula. Bekunzima kakhulu kodwa ngenhlanhla bonke bebezimisele ukufinyelela esivumelwaneni.
“Bebeyazi nemiphumela yesiteleka ngoba bekusebenza umgomo othi ‘uma ungasebenzi, ngeke uhole’. Ngibabize ukuthi bahlale phansi. Ngemva kwezinsuku ezimbalwa kwatholakala isisombululo kanti sebebuyele emsebenzini manje,” kusho yena.
UKaMadlopha-Mthethwa uthe ukuphela kwalesi siteleka kuzokwenza abalimi bomoba, ikakhulu baogwini olusenyakatho yesifundazwe bakhululeke. Uthe abalimi bebengenayo indawo yokuletha umoba ngesikhathi esibalulekile sokuwugaya.
Ukuvalwa kwezigayo zomoba bekubeka engcupheni imboni kashukela evele ibhekene nezinselelo, okubalwa kuzona uhlelo lokusindiswa kweTongaat Hulett noshukela oshibhile ongena ezweni uvela kwamanye amazwe.