Kubhuntshe ingqungquthela yeCosatu kubangwa izikhundla – ingqapheli

WULANGA KHANYILE

NGENKATHI izisebenzi zaseNingizimu Afrika zibhekene nenkanankana yokuphelelwa wumsebenzi nokunyuka kwezindleko zokuphila, umfelandawonye omkhulukazi ezweni uqophe umlando omubi seloku wasungulwa kubangwa ipolitiki yezikhundla.

Ngesonto elidlule kubhuntshe ingqungquthela yesi-15 yeCongress of South African Workers (iCosatu) ebiseGallagher Convention Centre eMidrand, eGauteng ngosuku lwesibili iqalile ngemva komdonsiswano ngesimo sabanye abaholi obekufanele bakhethwe.

Le ngqungquthela yiyona okuthathwa izinqumo ezimqoka, njengokuqoka abaholi abasha, ikakhulu umengameli, amaphini akhe nonobhala-jikelele, kudingidwe isimo somnotho nenhlalo esithinta izisebenzi. Bekulindeleke nokuthi iCosatu inqume ukuthi izokweseka bani phakathi kwe-ANC neSACP okhethweni lohulumeni bendawo olungomhlaka-4 wangoNovemba.

FUNDA NALAPHA: https://www.umbele.co.za/2025/12/18/okuhle-nokubi-okwenziwe-yicosatu-eminyakeni-ewu-40-yasungulwa-izingqapheli/

Umengameli weCosatu uNks uZingiswa Losi, obhephakanyiswe ezinye izinyunyana ukuthi abewunobhala-jikelele, uxolisile ngokubhuntsha kwengqungquthela. Uthe: “Kubuhlungu kithini ukuthi sikulesi simo. Akukaze kwenzeke emlandweni womfelandawonye.

I-Bureau for Economic Research (iBER), isikhungo esicwaninga ngezindaba zomnotho, ithe: “Ukubhuntsha kwengqungquthela yeCosatu yinto engakaze yenzeke emlandweni kanti sifakazela ukujula koqhekeko ngaphakathi kwalo mfelandawonye. Ukubhuntsha kwengqungquthela yimpi yombango wamaqeqebana ebanga izikhundla.”

I-BER ithe nakuba izinyunyana ezinkulu zalo mfelandawonye wezinyunyana eziwu-16 zifike kule ngqungquthela zifike sezivumelene ukuthi zizokwabelana kanjani izikhundla kodwa indaba isuke ngephini lokuqala likamengameli weCosatu nosanda kuyeka ukubawumengameli weNehawu uMnu uMike Shingange.

FUNDA NALAPHA: https://www.umbele.co.za/2026/09/08/izinkampani-zaphesheya-kufanele-zihlawule-ngokukopolota-i-afrika-umfelandawonye-wezinyunyana/

I-Nehawu ibike ukuthi ngeke imeseke ekubeni wumengameli omusha weCosatu, kanti iNational Union of Mineworkers ibimkhethile. Omunye obephakanyiswe ukuthi abewumengameli omusha yiphini limamengameli weSadtu uMnu uMabutho Cele, kuthi umengameli weSactwu uNks uSusan Khumalo abeyiphini lokuqala likamengameli bese umgcinimafa weNehawu uNks Kgomotso Makhupola abewumgcinimafa weCosatu.

UNks uLosi uthe: “Asiboni ukuthi loku kusho ukuhlukana komfelandawonye. Siwumfelandawonye owake wabhekana nesimo esinje ngo-2013. Ngemva kwango-2013 sifunde ukubekezelelana.”

Ingqungquthela ebhuntshile iphele ngesimemezelo esithi kuzophinde kuhlanganwe zingakapheli ezinsuku eziwu-30 ezinqunywe kumthethosisekelo.