IBhange lomBuso lixwayise amabhange aphula umthetho

YINTATHELI YOMBELE

UPHIKO lweBhange lomBuso olungamele ukusebenza kwamabhange iPrudential Authority (iPA) luthole amabhange amabili nenkampani ewumhlinzeki wezimali benamacala okungayigcini ngokuphelele eminye yemithetho elawula ukusebenza kwezinkampani ezisembonini yezimali.

Lolu  phiko lulandela isigaba 38 somthetho i-Financial Intelligence Centre (i-FIC Act) owashaywa ngo-2001, luthole ukuthi kukhona lapho iCapitec, i-Albaraka Bank ne-Ninety One Assurance Limited bephambuke khona ngokwezimfanelo okufanele bazigcine. 

I-Capitec itholwe inecala ngemva kokuhlolwa okwenziwa ngo-2023, lapho kwavela ukuthi kunezinto engazilandelanga njengokusho kwesigaba 45B se-FIC Act.

“I-Capitec ithole izixwayiso ezinhlanu zokuthi ingakuphindi ekwenzile, nokuholele ekutheni itholakale ingawugcini kahle umthetho, yasehlawuliswa uR28 million, uR5,5m wawo olengiswe izinyanga eziwu-36 kusukela ngomhlaka-13 wango-Okthoba wango-2025,” kusho iBhange lomBuso.

FUNDA NALAPHA: https://www.umbele.co.za/2026/04/17/isigcawu-sivune-ivune-iprudential-authority-ngezinsolo-nge-african-bank/

I-PA yahlola i-Albaraka Bank ngo-2021, yathola ukuthi ayisilandelanga isigaba 45B se-FIC Act. Ithole izixwayiso ezintathu zokuthi ingaphinde ikwenze etholwe inecala lakho, yahlawuliswa uR1,6m, okuwukuthi uR440 000 wawo ulengisiwe izinyanga eziwu-36 kusukela ngomhlaka-10 wangoJuni wango-2024.

I-Ninety One yayihlolwe ngo-2023 kanti nayo kukhona engakufezanga ngokwesigaba 45B se-FIC Act. Ithole izixwayiso ezimbili yase idonswa ngendlebe ukuthi ingakuphindi lokhu ekwenzile. Ihlawuliswe uR6m, kanti uR2,5m ulengisiwe izinyanga eziwu-36 kusukela ngomhlaka-19 wangoJuni wango-2025.