Amehlo azothi njo kwizibalo zokwehla kwamandla emali nesinqumo seBhange lomBuso
YINTATHELI YOMBELE
KULELI sonto akukho okutheni ngezibalo zomnotho, ngaphandle kokubheka ukukhishwa kwezibalo zokwehla kwamandla emali ngoLwesithathu nesinqumo seBhange lomBuso ngezinga lemalimboleko kule nyanga.
Isikhungo esicwaninga ngezomnotho iBureau for Economic Research silindele ukuthi izinga lokwehla kwamandla emali linyuke lisuka ku-4.3% ngoJulayi, liye ku-4.5% ngo-Agasti.
Uma kubhekwa phambili kulindeleke ukuthi ukwehla kwamandla emali kuqhubeke nokunyuka kancane kuze kuphele lo nyaka njengoba ukunyuka kwamanani kawoyela nophethroli emhlabeni kuqala ukuzwela kumanani kaphethroli ezweni. Ukuqina kwerandi kuze kubemanje kusizile ukunciphisa lo mphumela kodwa amanani kaphethroli akhomba ukuthi angase anyuke okukhulu ngenyanga ezayo.
FUNDA NALAPHA: https://www.umbele.co.za/2026/09/17/ukudayiswa-kwezinto-kukhule-ngo-3-4-ngojulayi-izibalo-zestats-sa/
Izibalo zokwehla kwamandla emali zizomenyezelwa ngosuku olufanayo nesinqumo seBhange lomBuso. Kulindeleke ukuthi iBhange lomBuso lidle imihlathi imalimboleko lingayishintshi ezingeni ekulona, nakuba singeke simangale uma liyikhuphula.
Kwezinye izindaba, inkomba enkulu yeBhange lomBuso ekhombisa isimo somnotho ngoLwesihlanu izoveza ukuthi umnotho uzokhula kangakanani ezinyangeni ezizayo.
NgoLwesithathu i-purchasing managers index, inkomba yesimo somnotho sokudingeka nokudayisa kwezimpahla, emazweni aseYurophu, e-United Kingdom naseMelika izokhombisas ukuthi umnotho emhlabeni uhambe kanjani nokuthi amanani aphezulu kawoyela nesimo sokuqinisa ibhawodi kwizimali kuhamba kanjani. – Le mininingwane itholakale kwiBureau for Economic Research