Uqweqwe lembokodo lubambe amatomu eNaamsa

YINTATHELI YOMBELE

UMKHANDLU owengamele imboni yezimoto i-Automotive Business Council usumemezele wuNkk uShinny Gobiyeza ozobamba isikhundla sesikhulu esiphezulu seNational Association of Automobile South Africa (iNaamsa).

UNkk uGobiyeza uyisikhulu esiphethe umsebenzi kweNaamsa kanti ugixatshezwe ngomsebenzi wokuphatha ngenxa yamava anawo okuhola nolwazi olunzulu lwemboni yezimoto.

Esitatimendeni, iNaamsa ithe ukuqoka uNkk uGobiyeza kuzoqinisekisa ukuthi umsebenzi awuphazamiseki, isimo siqhubeka ngendlela ejwayelekile futhi kunomholi ogxile emsebenzini okufanele awenze okwamanje.

Umengameli weNaamsa uMnu uPeter van Binsbvergen uthe beyibhodi bayabuthemba ubuholi bukaNkk uGobiyeza.

“UNkk uGobiyeza kudala aba sezinhlakeni zokuhola iNaamsa futhi ungumholi oqotho, othatha izinqumo ezifanele, unamava omsebenzi odingekayo nolwazi olunzulu lwakho konke okwenzeka embonini. Ibhodi iyamthemba ukuthi uzoqhubeka nomsebenzi omuhle obusuqalile.”

FUNDA NALAPHA: Uthi kwamsiza ukusebenza nabantu abadala futhi abazi ngaphezu kwakhe. Lo somnotho osesebenze emikhakheni eyehlukene uxoxe noSLINDILE KHANYILE ngohambo lwakhe

Uthe bazoqhubeka nokuphucula imboni, ukuyiguqula nokuqinisekisa ukuthi kunemithetho ehambisana nayo ezweni.

UNkk uGobiyeza uzibophezele ukuthi uzophatha kahle embonini ikakhulu njengoba kunezinguquko eziningi ezenzekayo.

“Kunezinguquko ezenzekayo manje embonini ezizoyisiza ukulungisela ikusasa. Ukusebenzisana ngokuhambisana kusukela kwabakha izimoto, abazidayisa emazweni aphesheya, abakha izinsimbi zazo nohulumeni nazo zonke izinhlaka ezithintekayo kuzoqinisa ukuthi isebenza isikhathi eside. Amandla ethu alele ekubambisaneni kwethu,” kusho yena.

Ngaphambi kokusebenzela iNaamsa uNkk uGobiyeza usebenze ezimbonini ezihlukene ephethe izikhundla eziphezulu. Uke wabawumqondisi emabhodini ezinkampani ezihlukene okubalwa iSizwe Paints, iSteiner, iBidAir Cargo, iCarlson Wagonlit Travel neRennies|BCD Travel, lapho asiza khona ukukhulisa inkampani nokuphathe kahle.

Phakathi kwezinkampani akade esezikhundleni zokuphatha kuzona kubalwa iDiageo, iBidvest Group, iPrime Group, iKansai Plascon neRock Construction Group. Kuzo zonke izikhundla ubeletha uguquko olubalulekile, aqinise ubudlelwano nezinhlaka ezihlukene futhi aqinisekise ukuthi izinkampani ziyakhula isikhathi eside ngokungenisa imali.

Lonke ulwazi lobuholi lumenza afaneleke ukuhola iNaamsa ngalesi sikhathi.
I-Naamsa ithembise ukumemezela abaholi abazophatha ngokugcwele ngesikhathi esifanele.