Amahhotela agudle ulwandle lwaseThekwini azolungiswa ngoR250 million
YINTATHELI KAMASIPALA
UMASIPALA waseThekwini umemezele ukuthi ibeyimpumelelo iSouthern African Association for the Conference Industry yalo nyaka.
Le ngqungquthela yezinsuku ezintathu ibiseCapital Zimbali, eBallito, enyakatho yaseThekwini. Igcwalise ukuthi umasipala uyakwazi ukwenza izingqungquthela ezisezingeni eliphezulu e-Afrika njengoba inengqalasizinda esezingeni eliphezulu, izindawo zokuvakasha nomnotho wezokuvakasha osimamayo.
Okuthokozelwe yizivakashi kulo nyaka yisimemezelo sokuthi amahhotela amabili agudle ulwandle eThekwini iSouthern Sun Elangeni neMaharani azolungiswa ngoR250 million.
FUNDA NALAPHA: https://www.umbele.co.za/2025/03/20/i-icc-yasethekwini-isizoba-neworld-trade-centre/
Izinhlelo zokulungisa la mahhotela zizothatha iminyaka emithathu kanti ziqale kuleli sonto. Abanikazi bawo bathe kuzovuselelwa izindlu zokuhlala izivakashi, ezokungcebeleka umphakathi, kuphuculwe ukubukeka kwawo kuhehe. Loku bathi kuzoqhubeka nokuheha izivakashi eziza eThekwini.
Iphini lenhloko yeDurban Tourism uNks uWinile Mntungwa lithe: “Le ngqungquthela ibalulekile ngoba iyona egqugquzela abatshalimali ukuthi bafake imali yabo eThekwini, ikhulisa imboni yokuvakasha, igqugquzela ukwenza izinto ngendlela entsha futhi idala imisebenzi.
“Siyaziqhenya ngokukhangisa ukuthi imboni yokuvakasha eThekwini namabhizinisi akhona asezingeni. Siyakuthakasela nokuthi iSouthern Sun iyaqhubeka nokutshala imali,” kusho yena.
UNks uMntungwa uthe umasipala uzoqhubeka nokuqinisekisa ukuthi leli dolobha laziwa ngokubayindawo evelele yokwenza izingqungquthela nemihlangano ehlukene.
Ingqungquthela isongwe ngokuthi zonke izinhlaka ezithinteka zizibopheze ukuthi zizoqhubeka nokusebenzisana, ukuzanezindlela ezintsha zokwenza izinto nokukhulisa imboni yamabhizinisi neyemicimbi.