I-Standard Bank iqinisa ubudlelwane neKwaZulu-Natali

INTATHELI YOMBELE

I-STANDARD Bank Group ibihlangane nendlunkulu yamaZulu ukudingida ukusebenzisana ukuthuthukisa isifundazwe eThekwini, KwaZulu-Natali, ngoLwesihlanu.

Isikhulu esiphezulu saleli bhange uMnu uSim Tshabalala uhlangane nesilo Inkosi uMisuzulu kaZwelithini.

Lo mhlangano ufakazela ukuzibophezela kwaleli bhange kulesi sifundazwe nokuqhubeka kwalo ukuseka ukusimama komnotho, osomabhizinisi, ukuthuthukisa ingqalasizinda nokufukula umphakathi kulesi sifundazwe esingesesibili ngokubanabantu abaningi eNingizimu Afrika.

Mayelana nokuhlangana kwakhe nesilo, uTshabalala uthe: “I-KZN iyingxenye ebalulekile yekusasa lomnotho waseNingizimu Afrika nomgudu obalulekile wohwebo nokusimama kwizwekazi i-Afrika.

FUNDA NALAPHA: I-Standard Bank ibeke eqhulwini ukuphucula i-Afrika – uTshabalala

Iyibhange elikhulu kunawo wonke ngokwezimpahla e-Afrika, iStandard Bank iyaqhubeka nokuzibophezela ukuseka ukusimama komnotho waseNingizimu Afrika nowamanye amazwe ase-Afrika ngokutshala kuwona, ukuthuthukisa ingqalasizinda, ukukhulisa amabhizinisi nokufaka bonke abantu emnothweni.

“Siyalazisa leli thuba lokuhlangana neSilo samabandla ngesifiso sethu esifanayo sokusimama komnotho nokuthuthukisa abantu baseKZN,” kusho yena.

Lesi sifundazwe sibalulekile kwiStandard Bank nomnotho waseNingizimu Afrika wonke. Siyisizinda sohwebo olumqoka negqalasizanda yokuthutha, okubalwa kuyona iChweba laseThekwini, eneqhaza elimqoka ekusimamiseni umnotho, uhwebo nomkhiqizo wezolimo ezweni lonke nasesifundeni i-Afrika eseningizimu.

Isilo sithe: “Siyaluthakasela ubambiswano olukhona phakathi kwethu nezikhungo ezizibophezele kwintuthuko, ukusimama komnotho nokuhlomisa abantu baseKZN.”