I-Standard Bank ibeke eqhulwini ukuphucula i-Afrika – uTshabalala

YINTATHELI YOMBELE 

IBHANGE elikhulu kunawo wonke e-Afrika ngokwezimpahla iStandard Bank linengqungquthela egqugquzela ukuxhasa i-Afrika ngezimali ukuze ibe nengqalasizinda esezingeni eliphezulu.

Le ngqungquthela ebizwa nge-“Financing Africa Forward” ibiseGoli izolo njengengxenye yezinhlelo zeBusiness 20 (iB20).

FUNDA NALAPHA: https://www.umbele.co.za/2025/07/17/isikhulu-esiphezulu-sophiko-lwe-africa-estandard-bank-umnu-ulungisa-fuzile-uxoxa-ngokubaluleka-kweg20-ib20-nengqalasizinda/

Isikhulu esiphezulu seStandard Bank uMnu uSim Tshabalala sithe beyibhange elikhulu e-Afrika bazibophezele ukuseka intuthuko ezosiza izwekazi ukuthi lisimame. 

Uthe kule ngqungquthela bekuxoxwa ngamasu azosiza ukukhulisa umnotho wase-Afrika kubekucijwa nabantu ngamakhono adingekayo. 

“Siyibhange elikhulu kunawo wonke e-Afrika, sizibophezele ukuseka intuthuko yabantu yesikhathi eside kulo lonke izwekazi. Enye yezindlela esibonisa ngazo lesi sibopho wukwenza izingqungquthela – njengalena – ezigxile ezintweni ezibaluleke kakhulu ukuletha ushintsho emnothweni wase-Afrika,” kusho yena.

Le ngqungquthela ibihlanganise izikhungo ezisebenza ngemali, izikhulu zohulumeni nabanye ababalulekile ekuthatheni izinqumo zokulungisa nokuthuthukisa ingqalasizinda yase-Afrika. 

Okubalulekile obekudingidwa wukulungisa ingqalasizinda ukuze iseke ukukhula komnotho. 
“Lona unyaka oyingqophamlando eNingizimu Afrika, eyengamele iG20, nase-Afrika yonkana. Kuyithuba lethu lokukhombisa amandla ethu okuhlanganisa umhlaba nokuqhuba izinhlelo zokusebenzisana kwamazwe omhlaba. ‘I-Financing Africa Forward’ iyingxenye yezinhlelo zethu zokushintsha indlela i-Afrika ebhekwa ngayo ngabatshalimali nokuyisiza ukuthi iveze umcebo wayo, ikhule ngokomnotho,” kuphetha uTshabalala.