Imeya yaseThekwini isekhaleni lomkhankaso wokuphucula ingqalasizinda yezokuvakasha
INTATHELI KAMASIPALA
ISIMO semboni yezokuvakasha eThekwini sizoshintsha njengoba imeya kaMasipala waseThekwini iqinisa umkhankaso wokuvuselela izindawo zokuvakasha ezingadumile nokwandisa ingqalasizinda yezokuvakasha yedolobha.
Imeya uMnu uXaba isanda kuvakashela eCoedmore Castle eKenneth Stainbank Nature Reserve eYellowwood Park, eningizimu yaseThekwini.
Le nqaba yomuzi wakwaStainbank yakhiwa ngo-1885, ngaphambi kokuthi lo mndeni usinikele kuhulumeni wesifundazwe. Nanamuhla lesi sakhiwo sisamile kanti sikhangisa ubugugu bezakhiwo zedolobha. I-Wilderness Leadership School nendawo yamagugu obuciko kukusona.
UXaba uthe lesi sakhiwo “siyigugu elifihlekile” elingakwazi ukuheha izivakashi, kwande izindawo zezivakashi ezikhona eThekwini.
Uthe: “Ukuvakashela kwami le nqaba bekuzowukuhlola isimo sesakhiwo nokuthi singabanaliphi iqhaza kwezokuvakasha. Kusukela ngithathe izintambo, ngiloku ngigcizelela indaba yokwandisa izinto zokuvakasha ezikhona. Ngenxa yalokho, bengibize isithangami sesidlo sasekuseni nabantu abasembonini yezokuvakasha, lapho nginxuse khona amabhizinisi ukuthi abambisane nomasipala ukwandisa izinto zezokuvakasha.”
FUNDA NALAPHA: https://www.umbele.co.za/2026/01/16/izinto-zihambe-kahle-kakhulu-ngamaholidi-angodisemba/
UXaba wengeze ngokuthi uhulumeni kufanele usukumele umkhankaso wokuthuthukisa ezokuvakasha. Yingakho umasipala uqhubeka nezinhlelo zokutshala imali ezintweni ezintsha zezokuvakasha.
Mayelana nenqaba, uXaba uthe uthakasile ukuthi nakuba zikhona izinselelo ngesimo ekusona kodwa isakhiwo sisamile.
“Ngikholwa wukuthi yigugu elifihlekile lei okufanele libeyingxenye yeqhinga lethu lezinto zezokuvakasha, le ndawo ivulelwe izivakashi. Okunye ezokwenza wukuqhakambisa amagugu ethu futhi yandise isibalo sezivakashi. Ngizoxoxa nohulumeni wesifundazwe ukuzwa ukuthi awunazo yini izinhlelo ngalesi sakhiwo,” kusho yena.
UXaba uphethe ngokuzibophezela ukuphuthumisa lo msebenzi, wabalula ukuthi lesi sakhiwo singenzela umasipala umsebenzi omkhulu.