Umasipala uthuthukisa amandla engqalasizinda kagesi

INTATHELI KAMASIPALA

IKOMITI lemisebenzi yohwebo likaMasipala waseThekwini lisanda kwenza izincomo ngokuphuthumisa ukuletha izidingo emphakathini.

Phakathi kwezinye izincomo ezenziwe yileli komiti wukuhlinzeka ingqalasizinda eyisipesheli yokuhlola ugesi edinga ukuthengwa ezosebenza izinyanga eziwu–36. Loku kulandela ukuthi umNyango oPhethe uGesi ubike ukuthi kunesidingo esiphuthumayo sokushintsha ingqalasizinda kagesi esigugile.

Ingqalasizinda entsha izokwazi ukubona izinkinga ezikhona kumakhebuli, ihlole amandla eqile futhi ihlole izinto zama-transformer relay.

Leli komiti liphakamise ukuthi kubekwe uR3.4 million ukubona nokulungisa izinkinga zikagesi ngokushesha, okuzokwenza ukuthi ugesi usheshe ubuye uma uhambile okuzolekelela izimboni, amabhizinisi nemizi yabantu. 

Le mali ezotshala izokwandisa amandla kagesi wamasipala ezimpahleni zawo zikagesi ezimqoka. 

FUNDA NALAPHA: https://www.umbele.co.za/2025/03/20/umasipala-wasethekwini-ubeke-ur10-billion-ukulungisa-ingqalasizinda/ 

Khonamanjalo, leli Komiti Lemisebenzi Yohwebo ligunyaze imenenja kamasipala uMnu uMusa Mbhele ukuthi enze isivumelwano sokusebenzisana neRowles Group ukuthi ithuthukise ingqalasizinda kagesi kwi-Eldorado Development.

Ingxenye enkulu yalo msebenzi wukuthuthukisa iWaterfall Substation, uhlaka lwesimo sayo olwaphothulwa ngo-2021 ukwandisa amandla ama-30 MVA transformer amabili ukuze abe ngama-60 MVA transformer amane.

Lo msebenzi uzokwandisa amandla kagesi okhona. Umsebenzi wokwakha uqhubeka ngokohlelo kanti kulindeleke ukuthi uphothulwe ngoJuni wango-2026.