Uhwebo luhambe kahle ngoDisemba, umnotho uzosimama kulo nyaka – izingqapheli

YINTATHELI YOMBELE

NAKUBA luqalile ushikishi lokusebenza njengoba ezinye izinkampani zivulile ngemuva kokuvalela amaholidi angoDisemba kodwa izinto zisacwebile ezimakethe zezimali. 

Emhlabeni jikelele isimo sishubile kwezomnotho nepolitiki ngenxa yokugasela kwamasosha aseMelika eVenezuela, kanti umengameli waseMelika uMnu uDonald Trump akafuni ukugcwalisa ukuthi ngeke ajube amasosha eGreenland kodwa ezinye izingqapheli zithi kungenzeka alandelise ngokugasela eCuba.

I-China isiphinde yaqinisa ibhawodi ekuhwebeni neJaphani kanti nakuba iMelika yenza imizamo yokuthi kubenomaluju phakathi kweRussia ne-Ukraine kodwa isaqhubeka impi.

Khonamanjalo, izibalo zezomnotho eNingizimu Afrika zikhombise izinto ezihlukene. I-purchasing managers index (iPMI) yangenyanga edlule, inkomba yesimo somnotho sokudingeka nokudayisa kwezinto ezidayiswayo, ayihambanga kahle. Nokho ukudayisa izimoto kuhamba kahle ngoDisemba, nakuba izibalo zomkhiqizo zangoNovemba zazehlile.

I-manufacturing PMI yase-Absa yehle ngo-1.5 points yawu-40.5 points ngoDisemba. Nokho kubalulekile ukuqaphela ukuthi i-inventories index, isikali senyanga soshintsho ezimpahleni sezinto zokukhiqiza ezingahluziwe, sehlile, kwehla nenkomba yokuqashwa kwabantu. 

FUNDA NALAPHA: https://www.umbele.co.za/2024/08/02/amanqampunqampu-esonto-4/

I-S&P Global SA PMI, ebheka imboni ezimele yonke yehlele ku-47.7 points ngoDisemba isuka ku-49 points ngoNovemba, izinga eliphansi kunawo wonke ezinyangeni eziwu-11. Ukuhweba kwehle kakhulu kusukela ngoJanuwari wangonyaka odlule. Ukukhiqiza kwehlile ngenxa yokwehla kwezidingo zamakhasimende nesimo somnotho esinzima. Ukuqala kwemisebenzi emisha kwehlile ngenyanga yesithathu kulandelana.

Nokho izingqapheli zithi kuyathembisa uma kubhekwa izinyanga eziwu-12 ezilandelaya, kubalwa nale nyanga, njengoba kulindeleke ukuthi isimo somnotho nesokuthenga izimpahla ezintsha zibengcono. 

Izibalo zeStatistics South Africa zikhombisa ukuthi umkhiqizo wezimpahla wehla ngo-1% ngoNovemba uma kuqhathaniswa unyaka nonyaka, ngemva kokwehla ngo-0.4% ngoNovemba. Kwehle izimboni eziyisikhombisa kweziyishumi  ngoNovemba. Imboni eyehle kakhulu ngeyezingodo nephepha eyehle ngo- 0.8% points yafinyelela ku-7.9%, kulandele eyensimbi eyehle ngo-0.6% points yafinyelela ku-2.5% neyezimoto neyezinto zezimoto eyehle ngo-0.4 points yafinyelela ku-4.4%. Nokho imboni yamakhemikhali inyuke ngo-5.5%, okuphose esivivaneni somkhakha wonke ngo1.1% points. 

Uma kubhekwa inyanga nenyanga isikali somkhiqizo sehle ngo-1.1% ngoNovemba, ngemva kokwehla ngo-1%  ngo-Okhtoba. 

Ngokusho kweNational Association of Automobile of South Africa (iNaamsa ), ukudayisa kwezimoto ezintsha kubewu-19.2% ngoDisemba. Kuthengwe izimoto ezintsha eziwu-8 983, okunyuke ngezimoto eziwu-7 882 uma kuqhathaniswa neziwu-41 101 zangoDisemba wango-2024. Kuthengwe izimoto ezincane kakhulu, okunyuke ngo- 20.1%, kwathi izimoto zokusebenza ezincane zanyuka ngo-7.8%, kwalandela eziphakathi nendawo ezinyuke ngo-5.6%. Nokho ukudayisa izimoto zokusebenza ezinkulu kwehle ngo-3%. 

I-Naamsa ilindele ukuthi ukudayisa izimoto kunyuke ngo-9 kuya ku-11% kulo nyaka. Ukudayisa kwezimoto ezidayiswa phesheya kunyuke ngo-4.4%, okuyizimoto eziwu-408 224. Kulindeleke ukuthi iNingizimu Afrika ihlomule ngokuxegisa amatomu kweYurophu, imakethe enkulu yayo, ngenxa yokunciphisa izimoto ezinezinjini ezishisa amafutha isidala, okwehliselwe ku-90% esikhundleni sango-100%. 

Nokho isimo sisemanzonzo ngenxa yamatomu ekuhwebeni nokubhekana ngeziqu zamehlo kwamanye amazwe. – Le mininingwane itholakale kwiBureau for Economic Research