Uhwebo lungenise uR22bn emnothweni weNingizimu Afrika

YINTATHELI YOMBELE

ININGIZIMU Afrika ingenelwe wuR22 billion owengeziwe ngokuhweba ngoJuni. 

Ngokwezibalo zohwebo ezintsha zeSouth African Revenue Service, kuvela ukuthi iNingizimu Afrika idayise izimpahla zenani eliwuR170.7bn, yathenga ezenani eliwuR148.6bn.

Lezi zibalo zihlanganisa ukuhweba neBotswana, i-Eswatini, iLesotho neNamibia. 

Kulo nyaka kusukela uqala kuze kube sekupheleni kukaJuni imali esingenile ngenxa yohwebo iwuR80.2bn, okuyimali encane kunoR92.0bn owawusungenile ngoJuni wonyaka odlule.

Uma kukhulunywa ngezimpahla iNingizimu Afrika ezidayisa ngaphandle, uR170.7bn odayiswe ngoJuni wehle ngo-2,9% uma uqhathaniswa noR175.8bn owawudayiswe ngoJuni wonyaka odlule. 

FUNDA NALAPHA: https://www.umbele.co.za/2024/08/15/amanqampunqampu-osuku/

Izimpahla ezithengiwe zinyuke ngo-0,6% uma ziqhathaniswa nezangoJuni wonyaka odlule, njengoba kwakungene ezenani eliwuR147.7bn kulo nyaka, okuthengwe ezibiza uR148.6bn.

Njalo ngenyanga izimpahla ezidayiselwa amanye amazwe zehle ngoR3.3bn zisuka kuR174.0bn, ziya kuR170.7bn phakathi kwangoMeyi nangoJuni.

Izimpahla ezithengwa yiNingizimu Afrika nyanga zonke zehle ngoR5.3bn noma ngo-3,5% zisuka kuR153.9bn , zaya kuR148.6bn. 

Ukwehla kwezimpahla ezidayiselwa amanye amazwe kwehliswe yigolide, amalahle nezimoto. Kwehlile uthenga uphethroli, uwoyela ongahluziwe namaselula. Izibalo zangoMeyi zehle ngoR1.6bn, zisuka kuR21.7bn, zaya kuR20.0bn.