Intsha ewosomabhizinisi izoqala izifundo zamabhizinisi 

YINTATHELI KAMASIPALA

ITHOLE ithuba eliyivelakancane intsha eyishumi engosomabhizinisi njengoba izoqala izifundo zamabhizinisi. 

Le ntsha izobasohlelweni lokucija osomabhizinisi ngamakhono abasiza ukuphumelela olwenziwa wuMasipala waseThekwini ngokubambisana neNewBridge Graduate Institute. 

Lolu hlelo  luyingxenye yezinhlelo zikamasipala wokucija osomabhizinisi ngombukiso wamabhizinisi iDurban Business Fair. Intsha inikwe imifundaze yokufunda izifundo zokuphatha amabhizinisi ukuze ithole ama-Higher Certificate in Business Administration. Imifundaze yenani likaR50 000 otholwa wumuntu ngamunye ikhishwe kwiNorth Regional Durban Business Fair ebingoMashi. 

FUNDA NALAPHA: https://www.umbele.co.za/2022/09/21/abasafufusa-bahlonyiswe-ngolwazi-lokusebenza-nohulumeni-kwidbf-intatheli-yombele-iyabika/

Osomabhizinisi abathole imifundaze kwakufanele bachaze ngezinhlelo zabo zamabhizinisi ngesikhathi sombukiso. Bazofunda izinyanga eziwu-18, bathole izitifiketi ezisezingeni i-NQF Level 5. 

Imenenja engamele izinhlelo zokusebenzisana nokusimamisa amabhizinisi eNewBridge ithe zibalulekile izinhlelo ezinjengalezi. 

“Lolu hlelo luhlomisa osomabhizinisi ngolwazi olutholakala ezincwadini olubasiza ukuphumelela, lubanike namakhono aphathekayo omsebenzi abawenzayo. Ukusebenzisana kwethu noMasipala waseThekwini kuyasisiza ukuthi sibeneqhaza elibonakalayo ekuvuleni amathuba asiza intsha ukuthi ilingane, okuyinto ebalulekile ukufukula umnotho we zwe lethu,” kusho uMnu uNathi Ndlovu.