Idolobha lizofukula umnotho wasolwandle ngoR12.1 million 

YINTATHELI KAMASIPALA

UPHIKO lokuThuthukisa umNotho nokuHlela lukaMasipala waseThekwini luzimisele ukufukula umnotho nokuletha uguquko oluhle ngokusebenzisa nezinhlaka ezihlukene.

I-eThekwini Maritime Cluster ikhethwe yabangenye yezinhlangano ezizokwazi ukuzanohlelo oluqondile lokusimamisa umnotho wasolwandle i-Maritime Industry Development Programme. 

Kulindeleke ukuthi umasipala ubenobuchwepheshe besimanje obuzosiza ichweba nedolobha ukusebenza kahle njengamanye amachweba asemazweni asimeme kwezomnotho. 

FUNDA NALAPHA: https://www.umbele.co.za/2025/03/24/ukufunda-kuyinsika-yebhizinisi-lokuvakasha-elihlukile/

Ukuqinisekisa ukuthi lesi sifiso siyafezeka umasipala waseThekwini ne-eThekwini Maritime Cluster basayine isivumelwano sokusebenzisana esizoqala ngomhlaka-1 wangoJulayi siphele ngomhlaka-30 wangoJuni wango-2027. Umasipala ubeke uR12.1 million ozosebenza eminyakeni emithathu ezayo. 

Umnotho wasolwandle ubalulekile ohwebeni lomhlaba, njengoba u-80% wezimpahla uhamba ngolwandle. 

Ichweba laseThekwini libalulekile njengoba ngoMashi lilethe umthamo wezimpahla awu-21 million, imikhumbi ewu-923 ethwala izimpahla ezihlukene. 

Leli chweba liletha u-65% wezo zonke izimpahla ezivela kwamanye amazwe ezisuke ziza eNingizimu Afrika, lisize nokudlulisela ezinye izimpahla kwamanye amazwe ase-Afrika. 

Imboni yasolwandle ibalulekile ekufukuleni umnotho waseThekwini, ikakhulu imboni yokukhiqiza neyokuthutha. Ngesikhathi umasipala ubona ukubaluleka kwemboni yasolwandle uzenohlelo oluzosiza ukuthi kuhlale kumatasa echwebeni ukuze kukhule umnotho.