Umasipala uklomelise osomabhizinisi abavelele

YINTATHELI KAMASIPALA

UMASIPALA waseThekwini uklomelise amabhizinisi aheha izivakashi futhi aqhakambisa leli dolobha emcimbini i-4th Annual Durban Tourism Awards.

I-Durban Tourism ithole izicelo eziwu-161 zokungenela le miklomelo. Abaphumelele ezigabeni eziwu-17 bahlomule ngemali nezinsiza ezizokhulisa amabhizinisi abo ezokuvakasha.

Urisho osebenza emabhishi aseThekwini uMnu uSimon Sibiya uthole indondo ye-Best Rickshaw Award ngomsebenzi wakhe.

FUNDA NALAPHA: https://www.umbele.co.za/2023/06/23/ibambe-ngakho-i-durban-tourism/

Umklomelo womkhakha wamahhotela nendawo yokwenza imihlangano, phecelezi i-meetings, exhibitions and special events, uwinwe yiCoastlands uMhlanga. 

Umklomelo wendawo yokuhlala izivakashi unqotshwe yiView Boutique Hotel and Spa. 

I-Gray’s Horses inqobe umklomelo we-Exceptional Visitor Experience Award, kwathi iKas’ Lam Events yawina i-Best Owners and Promoters.

I-Tour Operators Award itholwe yiDurban Fever Travel and Tours, uMnu uSanele Mvuyane wemuka ne-Tour Guides Award.

IGugu Mobile Boutique ihambe nomklomelo i-Best Crafter, kwathi iWheels on Waves yahlabana ngendondo i-Universally Accessible and Green Sustainability Award.