ISibaya Coastal Precinct kaR6 billion izosimamisa umnotho
INTATHELI YOMBELE
UNDUNANKULU waKwaZulu-Natali uMnu uThamsanqa Ntuli wethule ngokusemthethweni uhlelo oluzosimamisa umnotho iSibaya Coastal Precinct ngoLwesine eThekwini ezodla uR6 billion.
Kulindeleke ukuthi idale imisebenzi engaphezu kwewu-70 000 eminyakeni emihlanu ezayo.
Lolu hlelo luzolekelela izinhlelo zikahulumeni nemboni ezimele zokuletha umehluko, ukulungisa ingqalasizinda nokuvuselela umnotho wesifundazwe.
FUNDA NALAPHA: https://www.umbele.co.za/2024/08/22/izinhlelo-zetheku-zokuthuthukisa-umnotho/
I-Sibaya Coastal Precinct kulindeleke ukuthi sihehe njengoba sigudle ugu olusenyakatho yeTheku. Kuzobawuhlelo olunezindawo zokuhlala, ezokuhweba, ezokuhlala izivakashi nezokungcebeleka.
Uma usuphelile lo msebenzi kulindeleke ukuthi uhehe abatshalimali baseNingizimu Afrika nabakwamanye amazwe. Luzofukula ezokuvakasha lugqugquzele nokusimama komnotho waleli zwe.
Undunankulu uncome abanikazi balo msebenzi ngombono wabo nokuzibophezela ekukhuleni kwesifundazwe. Ubalule ukuthi loku kutshala imali kukhombisa ukuthi imboni ezimele iyakholelwa emnothweni walesi sifundazwe.
“Lolu hlelo aluwona nje umsebenzi wokwakha kodwa olokuthi iKwaZulu-Natali iyabamukela osomabhizinisi. Kukhombisa okungafezwa uma imboni ezimele nohulumeni besebenzisana ukuze abantu babenempilo engcono,” kusho yena.
Ugcizelele ukuthi uhulumeni wobumbano esifundazweni usebenza ngokuzikhandla ukuheha abatshalimali njengoba unezinhlelo ezicacile zokulwa nobugebengu futhi ulungisa ingqalasizinda, wenza kubelula nokuthi kuphumelele izinhlelo zokusimamisa umnotho.
“Siqinisa ubudlelwano bethu nezinhlaka zomthetho ukuze abatshalimali babone isifundazwe sethu siyindawo ephephile yokuqhuba ibhizinisini. Asibeki phambili inhlalakahle yosomabhizinisi kuphela kodwa senza esikwenzayo ukuvikela bonke abantu baKwaZulu-Natali. Loku kuzosimamisa umnotho kuvulele abantu amathuba omsebenzi. Kuhlomulise nosomabhizinisi abancane ngebhizinisi,” kusho uNtuli.
Uthi njengoba kuphela unyaka isifundazwe sibuswa wuhulumeni wobumbano, lo msebenzi ukhombisa umphumela wezinto ezingenzeka uma kusetshenzwa ngokubambisana.