ITheku lithekela ulwazi ngokuphucula umnotho e-United Arab Emirates

YINTATHELI KAMASIPALA

UMASIPALA waseThekwini ufuna ukusimamisa umnotho ubenedolobha elinengqalasizinda esezingeni njengoba usanda kuya e-United Arab Emirates (i-UAE) ukuyocosha amasu. 

Kusukela ngomhlaka-16 wangoJuni kuya mhlaka-19 imenenja kaMasipala waseThekwini uMnu uMusa Mbhele ihambe nethimba bayoxoxa nosomabhizinisi nezinhlangano ezisimamisa umnotho wase-AUE.

Baxoxe nohulumeni nosomabhizinisi base-Abu Dhabi ngamasu okusimamisa umnotho, awokulungisa ingqalasizinda, awokwenza idolobha elikwazi ukumelana nanoma yisiphi isimo sezulu, ezokuthutha nokuqinisa ezobuchwepheshe besimanje. 

FUNDA NALAPHA: https://www.umbele.co.za/2025/06/13/umasipala-usondela-kubantu-ukubasiza-ngezinhlelo-ezihlukene/ 

Ithimba lenze okulandelayo: 

1) Lenze isivumelwano ne-Intergrated Transport Centre ngezokuthutha ezinobuchwepheshe besimanje, ezizoqinisekisa ukuthi izidingo zaseThekwini ziyafezeka;

2) Libheke izinhlelo zabatshalimali ezihambisana nobuchwepheshe besimanje eMaqta Technologies, engaphansi kwe-Abu Dhabi Ports Groups. Bekugxilwe ohlelweni lobuchwepheshe iSingle Window ne-Invest in KZN; 

3) Liqinise izinhlelo zokucobelelana ngolwazi phakathi kwe-Abu Dhabi neKwaZulu-Natali oluzosiza ukuguqula ukuthutha izimpahla nokusebenzisa ubuchwepheshe kwingqalasizinda ehlukene, okubalwa esetshenziswa uma izimpahla sezihlolwa yizinhlaka zomthetho ezinjengeBorderVision, iRiskLab neBorderMeter.

UMbhele ubehambe nobheke izinhlelo zentuthuko uMnu uLungelo Buthelezi nenhloko ebambile oPhikweni lwezokuThutha eThekwini uNks uNelisiwe Zama, okuyibona akade besesithangamini sokucobelelana ngolwazi semboni yokwakha nezokuthutha. 

Iphini likamengameli wezinHlelo zokuSebenzinsana eSheikh Maktoum NEO Technologies Office UDkt u-Emily Mogano ukuthakasele ukukhula kobudlelwano babo nomasipala. Ithimba likangqongqoshe womNyango wezokuThutha e-UAE uMnu u-Abdulla Al Hashmi likhulume ngobuchwepheshe obusetshenziswa kwezokuthutha nengqalasizinda e-Abu Dhabi.

U-Al Hashmi uthe bakulungele ukusebenzisana nomasipala ukuze ubenobushwepheshe obufanele. 

UMbhele uthi zonke lezi zinhlelo zikhombisa ukuthi bazibophezele ukusebenzisana namanye amazwe, ukusimamisa umasipala, ukuheha abatshalimali baphesheya, ukuletha uguquko olufanele kwezokuthutha nobuchwepheshe kuzo zonke izinhlaka.