Uhlelo lukamasipala lokucija abafuya izinkukhu luchamisele abawu-25

YINTATHELI YOMBELE

LUZOGUQULA izinto embonini yokufuya izinkukhu uhlelo lokucija amakhono abafuyi obeluseNtshanga, entshonalanga yaseThekwini. Abafuyi akade beyingxenye yohlelo lokucija amakhono bachaze ukuqeqeshwa kwabo njengento eshintsha impilo. 

Lolu hlelo lokufundisa abafuyi izinto ezihlukene luqale ngomhlaka-3 lwaze lwaphela ngomhlaka-20 wangoMashi esizindeni sezolimo sikaMasipala waseThekwini esenzelwe imiphakathi esentshonalanga yaseThekwini eNtshanga. Kuqeqeshwe abafuyi abawu-26.

Uhlelo lokuqeqeshwa ukukhiqiza izinkukhu lwenziwe wuMasipala waseThekwini ngokubambisana ne-Ikhono Foundation neWoza Nami.

IWoza Nami wuhlelo lwe-Emerging Farmers Empowered in Poultry Production, exhaswe yiGreen Trust neDG Murray Trust egxile ekuthuthukiseni nasekuqinisekiseni ukuthi abantu bathola kalula ukudla okunempilo nokuqinisa izinhlelo zokutshala ukudla emiphakathini eziseduze nezikhungo zezolimo kumasipala.

FUNDA LAPHA: https://www.umbele.co.za/2024/10/29/umfelandawonye-wabesifazane-basemakhaya-ukhuthazwe-ngendlela-yakudala-yokulima/

Uhlelo lokuqeqesha lunikeza abafuyi amakhono adingekayo ukuqala nokuphatha amabhizinisi ezinkukhu. Ngaphezu kokuqeqeshwa abantu akade bekulolu hlelo bathole ukusekwa ukuqala amabhizinisi abo, okufaka phakathi amachwane, ukudla kwezinkukhu namahhoko. 

Emva kokuqeqeshwa abafuyi banikwe izitifiketi ezisezingeni le-NQF Level 2 yi-Agriculture Sector Education and Training Authority, okubanika igunya elibalulekile ohambweni lokubangabalimi abazimele.

Omunye obeqeqeshwa wuNksz uNomvula Mzulwini waseHammarsdale, entshonalanga yaseThekwini, uthe isitifiketi simnika ukuhlonipheka ekufuyeni. Uhlela ukuqala ibhizinisi lezinkukhu nokuvula amathuba omsebenzi emphakathini.