I-Africa’s Travel Indaba ingenise ngaphezu kukaR500 million
WUTHOBILE ZWANE
I-AFRICA’S Travel Indaba yango-2024 izuze okungaphezu kobekulindelekile njengoba ingenise imali engaphezu kukaR500 million emnothweni ngezinsuku ezine.
UNks uWinile Mntungwa, iphini lenhloko eDurban Tourism, uthe ngisho nesibalo sabantu abebezokhangisa nabathengi sinyuke kakhulu. Isibalo sabebekhangisa ngemikhiqizo yabo sinyuke ngo-1 200 kanti nemihlangano ebikhona inyuke kakhulu, okusho ukukhula kwemboni yezokuvakasha.
UNks uMntungwa usho kanje izolo ngesikhathi kusongwa lo mbukiso wezokuvasha oqale ngoMsombuluko e-Inkosi Albert Luthuli International Convention Centre.
“Siyidolobha siyakholelwa ekwesekeni amabhizinisi asafufusa, ikakhulukazi kwezokuvakasha. Siyibonile imiphumela yokubambisana kwethu nezinhlangano zezokuvakasha. Sixhase izinkampani eziyisishiyagalolunye ezibizwa ngama-Community Tourism Organisations ngemali engaphezu kukaR5m, sizazisa ngezinhlelo zokuzithuthukisa namathuba embukisweni kamasipala, ezweni lonke nakwamanye amazwe. Loku kuzikhangisa kubalulekile ukuze zikhule,” kusho yena.
UmNyango wezokuVakasha ezweni uxhase amabhizinisi asafufusa awu-120. “Okwenzeke emnothweni ngenxa ye-Indaba kusukela kwingqalasizinda, izindawo zokuhlala kuye ezindaweni zokudlela nezokuthutha kube kukhulu kakhulu,” kwengeza uNks uMntungwa.
Imali engene ngqo emnothweni waseThekwini ingaphezu kukaR226m kanti kungene noR333m othe xaxa.
I-Indaba ivulwe nguNgqongqoshe wezokuVakasha uNkk uPatricia De Lille kanti indlalelwe yiBusiness Opportunity Networking Day.
UNks uNombulelo Guliwe, isikhulu esiphezulu seSouth African Tourism, uthe begcina ukubheka ziwu-8.9m izivakashi ezifikile ezweni, kanti kuzona eziwu-6.4m bezivela kwamanye amazwe e-Afrika, kuthi eziwu-1.8m bekungezakwamanye amazwe aphesheya.
Uthe yize izibalo zezivakashi zingakafiki lapho ezazikhona ngaphambi kokubheduka kwe-COVID-19 kodwa kuyabonakala ukuthi ziyakhula.
UNksz uPhindile Makwakwa, i-chief operating officer eTourism KwaZulu-Natal, uthe bamagange nge-Indaba 2025, abakholwa wukuthi izoba nkulu futhi ibengcono kakhulu.
UNksz uMakwakwa uthi bayibheke ngabomvu i-Indaba yango-2025
Izibalo ze-Africa’s Travel Indaba:
- Bawu-9 280 abantu ababebhalisile ukuza kwi-Indaba;
- Bawu-4 510 abantu abebebhalisele ukukhangisa;
- Ziwu-1 272 izinkampani ebezibhalisele ukukhangisa;
- Awu-36 amazwe abekhangisa;
- Bawu-317 abezindaba abebekhona;
- Izibalo zicashunwe kwiSouth African Tourism