I-Shoprite iqinise ibhodi yayo ngoMaseko noMathebula. INTATHELI YOMBELE iyabika

INKAMPANI edayisa ukudla iShoprite imemezele ukuthi isiqoke uMnu uSipho Maseko noSolwazi uHlengani Mathebula njengamalungu amasha ebhodi yawo kusukela ngoLwesibili. 

UMaseko, oke waba yisikhulu esiphezulu eTelkom, uwummeli kanti unamava ekuphatheni izinkampani eNingizimu Afrika. Wake wayisikhulu seBP Africa ne-chief operating officer eVodacom South Africa. 

Usanda kuba sematheni nenkampani yakhe i-Afrifund eyingxenye yomfelandawonye ozama ukuthenga amasheya eTelkom. Wake waba nawusihlalo weSAPREF nelungu lebhodi le-Afrox neTrudon.

UMaseko uyilungu lebhodi elulekayo eCentre for Development and Enterprises, i-Airlink neHeidrick and Struggles.

UDkt uMathebula uyisikhulu samabhizinisi esaziwayo. Uke wasebenzela iSouth African Revenue Services, iFNB, i-Absa neBhange loMbuso. 

Manje uwusolwazi we-Strategy, Finance and Investment e-University of Limpopo, usihlalo weMedia

Development and Diversity Agency, usihlalo weBlack Business Executive Circle nelungu lebhodi yeHealth Professionals Council of SA. 

Wake wayilungu lebhodi yeBMW SA, usihlalo we-Eskom Pension Fund nosihlalo we-African Leadership Group kanti ungomunye wabasunguli beBlack Business Council. 

Khonamanjalo, iSARS imemezele ukuthi ukhomishana wayo uMnu u-Edward Kieswetter ukhethwe wangusihlalo omusha weWorld Customs Organisation (iWCO). 

Ukhethwe ngempelasonto ekomkhulu lale nhlangano eBrussels, eBelgium. I-WCO yihlangano enamalungu awu-185 kanti iningi lawo ngamazwe asathuthuka.

• Lolu lwazi lutholakale kwiziko lezindaba zeJSE, iSENS naseSARS