Ibhodi entsha yePublic Investment Corporation izoqeda ukuxokozela – ungqongqoshe
WUBONISWA MOHALE
UNGQONGQOSHE eHhovisi likaMengameli uNks uKhumbudzo Ntshavheni umemezele ibhodi entsha yenkampani kahulumeni etshala imali iPublic Investment Corporation (iPIC) njengoba uhulumeni ufuna isimo sibuyele kwesijwayelekile kulesi sikhwama esitshala izimpesheni zezisebenzi zikahulumeni.
Izolo, uNks uNtshavheni uthe umhlangano wekhabhinethi unqume ukuqoka iphini likangqongqoshe womNyango wokuHlela uMnu uSeiso Mohai ukuthi abewusihlalo omusha.
I-PIC itshala imali yempesheni yezisebenzi zikahulumeni, eyomshwalense wabantu abangasebenzi neyomshwalense wabalimala emsebenzini ebalelwa kwewuR3,6 trillion.
UNks uNtshavheni uthe: “Ukuqinisekisa ukuthi umsebenzi wePIC awuphazamiseki, uhulumeni ubone kungcono ukuthi uqoke ibhodi entsha. Ungqongqoshe womNyango weziMali u Mnu u-Enoch Godongwana uzoqinisekisa ukuthi iziphakamiso ezenziwa yiKhomishana yeJaji uLex Mpati ngePIC ziyasebenza.”
UMohai une-Master of Science in Technology and Management ne-Postgraduate Diploma in Management of Technology Innovation yaseDa Vinci Business School.
FUNDA NALAPHA: https://www.umbele.co.za/2026/07/30/i-pic-inomlando-wezinkinga-ngendlela-ephethwe-ngayo/
Udabuka eFree State, uyilungu le-ANC kanti uke wajutshwa eminyangweni ehlukene ezingeni likahulumeni wesifundazwe ngaphambi kokuya ePhalamende.
Amanye amalungu ebhodi entsha yiphini likasihlalo weDevelopment Bank of Southern Africa uNks uPatience Nqeto, yiphini likasihlalo we-African Development Bank uNks uSwazi Tshabalala, owayewumshushisi weNational Posecuting Authority u-Adv u-Ouma Rasethaba, isikhulu esiphezulu eMondi uNks uViviene McMenamin, umqondisi omkhulu eHhovisi lomGcinimafa uNks uMoipone Ramoipone nomcwaningimabhuku owake wasebenza ePwC nase-Absa uMnu u-Itani Mafune.
Isikhulu esisabambile ePIC uNks uBatandwa Damoyi sithe bayakuthakasela ukuthi uGodongwana nekhabhinethi balusukumele udaba lokukhetha ibhodi entsha ngoba loku kuzobuyisela isimo kwesijwayelekile ePIC. Uthe bazimisele ukusebenzisana kahle nebhodi entsha futhi babuyise ithemba kumakhasimende ePIC.
UNks uDamoyi osezogxila ekukhuliseni imali etshalwa yiPIC
Umkhulumeli weCongress of South African Trade Unions uMnu uMatthew Parks uthe bayabonga ukuthi iPIC isinebhodi futhi uMohai uyiqabane elinamava elaqinisekisa ukuthi kuchitshiyelwa umthetho i-PIC Act ngo-2019 ngesikhathi kunababengafuni ukuthi uchitshiyelwe ngoba besebenzisa amandla ombuso ukufeza izinhloso zabo.
“Asingabazi ukuthi uMohai uzobuyisela isimo kwesijwayelekile ePIC njengoba nangesikhathi sokugwamanda amandla ombuso walwa. Siyayamukela ibhodi entsha. Sinxusa ukuthi iziphakamiso zikaMpati zisebenze futhi kuqinisekiswe ukuthi okwenzeka ePIC kuhlala obala. Sifuna umengameli (uMnu) uCyril Ramaphosa aqoke abaphenyi abazophenya yonke inkohlakalo eyenzeka ePIC,” kusho yena. Uthe bazosiqapha ngeso lokhozi isimo ePIC ukuqinisekisa ukuthi impesheni yezisebenzi ivikelekile.