Kuzolungiswa amadepho neziteshi kweGO! Durban
YINTATHELI KAMASIPALA
UMASIPALA waseThekwini usezinhlelweni zokuqinisekisa ukuthi zonke iziteshi zeGO! Durban Intergrated Public Transport Network (iPTN) zisesimweni esifanele njengoba ubeke eceleni imali yokuzilungisa amanye amadepho.
Kuleli sonto isigungu esithatha izinqumo kumasipala sinike umqondisi wemisebenzi yobungcweti woPhiko lwezokuThutha lukamasipala i-eThekwini Transport Authority igunya lokusebenzisa uR39 million wonyaka wezimali wango-2025/26 ukulungisa amadepho amabhasi eNtuzuma, ku-Alice Street naseMlaza.
La madepho aneqhaza elibalulekile emsebenzini wangomuso weGO! Durban. Isinqumo sokusebenzisa le mali sithathwe ngemva kokuthi uMnyango wezokuThutha uthe uzonciphisa imali oxhasa ngayo izinhlelo zokuthutha zomasipala eminyaka emithathu ezayo. Uyalele omasipala ukuthi bazihlelele kahle izinhlelo ze-IPTN ukuze zihambisane nemali esincishisiwe.
FUNDA NALAPHA: UMasipala waseThekwini wethule isikhungo semininingwane yezokuthutha umphakathi
EThekwini umasipala unqume ukubuyekeza izinhlelo zeGO! Durban ukuqinisekisa ukuthi uvikela ingqalasizinda osuyakhile ngokuqinisekisa ukuthi zikhona imali ezoyigcina isebenza isikhathi eside.
Izinhlelo ezibuyekeziwe zibeka phambili ukusebenzisa ingqalasizinda esikhona nokugxila ekutheni wonke umsebenzi wenziwa ngokugcwele ngonyaka wezimali wango-2026/27.
Umsebenzi wokulungisa amadepho uthathwa njengobalulekile futhi ofanele wenzeke ukuseka iGO! Durban.
Umasipala uzoqinisekisa ukuthi imizila yeGO! Durban iyasebenza lapho sekukhona ingqalasizinda, ikakhulu umzila osuka eBridge City uye ePinetown, osuka eBridge City uye eThekwini.
Ngokombiko othulwe esigungwini somkhandlu, ukulungisa ingqalasizinda kuzoqinisekisa amadepho amabhasi okukhona kuwona eseNtuzuma, eku-Alice Street neseMlaza ayaphuculwa ukuze akwazi ukusebenzisana neGO! Durban ngisho ingakaqali ukusebenza ngokugcwele.