I-Lions’ Den Business Plan Competition isivulile
YINTATHELI KAMASIPALA
UKUSEKA osomabhizinis abancane ukusimamisa amabhizinisi abo, uMasipala waseThekwini usukuvulile ukungenela umncintiswano walo nyaka i-Lions’ Den Business Plan Competition.
Ngalo mncintiswano, umasipala usuke umema osomabhizinisi abancane namabhizinisi ayimifelandawonye abanamasu okwenza izinto ngendlela entsha ukuzikhangisa.
Bazikhangisela ukuthola usizo lwezimali, amathuba okungena ezimakethe abasebenza kuzona, ukusizwa ngabanye osomabhizinisi ababacathulisayo nezinsiza ezingabasimamisa futhi yithuba lokubakhulisa, elokubaklomelisa ngomsebenzi abawenzayo nelokuhlangana nabantu abangasebenzisana nabo nabatshalimali.
Umasipala uhlose ukukhuthaza ukwenza izinto ngendlela entsha kosomabhizinisi, ukugcina izinkampani zisebenza isikhathi eside nokuncintisana okuhle eThekwini.
Kunemikhakha ehlukene okubalwa kuyona owe-Emerging Business, ibhizinisi elisafufusa elingenisa imali engaphansi kwangoR100 000, owe-Established Business, ibhizinisi eselisimeme nelingenisa imali ephakathi kwangoR100 000 noR500 000 ne-High Performing Enterprise, ibhizinisi elingenisa imali engaphezu kwangoR500 000.
FUNDA NALAPHA: I-Lions Den Business Plan Competition izohlomisa abasafufusa
Usihlalo weKomiti lokuThuthukisa umNotho nokuHlela kumasipala uMnu uThembo Ntuli uthe: “Eminyakeni edlule lo mncintiswano ususeke osomabhizinisi ukuze bakhule, badale imisebenzi futhi bangene ezimakethe. Uyindawo ebalulekile eshintsha imibono ibengamabhizinisi aphumelelayo.”
Omunye wosomabhizinisi abake baphumelela kulo mncintiswano uMnu uKwanele Mngoma nowumsunguli weKIK Refrigerator Rentals uthi lo mncintiswano ubasize ngemali futhi wabacija ngamakhono ebhizinisi.
“U-R40 000 esawuthola sawusebenzisela ukuthenga amafriji ayishumi. Asisizile ukukhula ngoba kudala besinamafriji amancane kodwa abantu bedinga amaningi. Sikwazile ukufinyelela kumakhasimende amaningi, sangenisa imali futhi sakhulisa nomsebenzi. Manje iKIK Refrigerator Rentals isiqashe abantu abayishumi futhi sisaqhubeka nokubakhela amathuba,” kusho yena.
Ngaphandle kokuthola usizo lwezimali, uMngoma uthi usizakele ngamakhono awadingayo ukuheha abatshalimali, wathola nomuntu omcathulisayo, kwavuleka amathuba okufunda nawokusebenzisana nabanye.
Ngeminye imininingwane ethinta lo mncintiswano, kungashayelwa ku-031 309 8280. Amafomu okungenela atholakala ku-Lions’ Den Business Plan Competition noma ku-Urban Gov ngaphansi kwewindi elithi Business nakubo bonke oSizakala.
Ayatholakala futhi nasemahhovisi eDurban Small Enterprise Development Agency naweSMME Development aku-199 Anton Lembede Street noma ngokuthumela i-email ku-yanga.nyakeni@durban.gov.za
Amafomu agcwalisiwe kufanele athunyelwe kula mahhovisi ngaphambi komhlaka-30 wale nyanga.