Isigcawu sivune iPrudential Authority ngezinsolo nge-African Bank

WUBONISWA MOHALE

UPHIKO oluthatha izinqumo ngamacala athinta izikhungo ezisebenza ngemali iFinancial Services Tribunal ivune uphiko olubheka ukusebenza kwamabhange lweBhange lomBuso iPrudential Authority (iPA) eyathola ukuthi i-African Bank ibikhuphula imali enayo.

Uphiko olubheka ukusebenza kwamabhange lweBhange lomBuso iPA ngemva kokuthola umbiko we-African Bank ngesimo sayo sezimali lwathi alwenelisekile.

Yabona ukuthi i-African Bank yaboleka inkampani yayo yomshwalense i-African Insurance Group imali. Le mali yakhokhelwa i-African Bank Holdings yayimihlomulo yamasheya. I-African Bank Holdings, ephethe i-African Bank, yathenga amasheya e-African Bank ngoR685 million. Leli bhange lase libanemali eningi.

I-PA yathi ayihambisani nalo mbiko ngoba ukhuphula isimo sezimali se-African Bank ngemali eloku ijikeleza kuyona nezinkampani zayo.

FUNDA NALAPHA: I-African Bank ihlawulisiwe ngo‘kukhohlisa’ amakhasimende

I-African Bank ayivumelananga nalo mbono, iPA yase idlulisela umbiko wayo kwiFinancial Services Tribunal, evune iPA.

IBhange lomBuso lithe akukho elizokuphawula ngalolu daba ngoba lingaphawuli ngezindaba ezithinta izikhungo elizishayela umthetho.

I-African Bank ithe lesi sinqumo asiwathinti amakhasimende futhi ngeke umsebenzi uphazamiseke.

“Siyibhange elilandela imithetho futhi nalolu daba lubonakale emva kokuthi iPA ibheka umbiko wethu esiwuthumela kuyona.

“Seloku lwaqala loku daba ngoMeyi wangonyaka odlule asifihlanga lutho futhi nabatshalimali bebazi ngalo. Siyawulandela umthetho ngaso sonke isikhathi, sikhuluma iqiniso ngesimo sethu sezimali,” kusho i-African Bank esitatimendeni.

Ithe iyasihlonipha isinqumo seFinancial Services Tribunal futhi izibophele ngokuphatha ngendlela, ukulandela umthetho nokubambisana kahle nabantu abashaya umthetho emsebenzini.