INingizimu Afrika ingenise uR17,8 billion owengeziwe ngohwebo
YINTATHELI YOMBELE
IZIBALO ezintsha zomqoqintela zikhombisa ukuthi uhwebo lwangoJuni lungenise uR17,8 billion owengeziwe esikhwameni sikahulumeni. Le mali ingene ngokudayisa izimpahla ezibiza uR193,6bn kwamanye amazwe nokuthenga ezibiza uR175,8bn.
Kulezi zimpahla kuhlanganisa nohwebo olwenzeka phakathi kweNingizimu Afrika neBotswana, i-Eswatini, iLesotho neNamibia.
Uma kuqhathaniswa izibalo zonyaka nonyaka kusukela ngomhlaka-1 wangoJanuwari kuze kubemhlaka-30 wangoJuni imali eyengeziwe engeniswe wuhwebo iwuR109,1bn, okusho ukuthi iphezu kwangoR81,5bn owawusungenile ngesikhathi esifanayo ngonyaka odlule.
Imali engene ngokudayisa izimpahla ngoJuni ibewuR193,6bn, okuyenza ibephezulu ngo-13,5% uma iqhathaniswa noR170,5bn owawungene ngoJuni wangonyaka odlule.
FUNDA NALAPHA: https://www.umbele.co.za/2026/05/04/izimoto-zithwale-umnotho-waseningizimu-afrika-izibalo-ezintsha/
Imali engene ngezimpahla ezingena ezweni ikhuphuke ngo-18,1% yawuR175,8bn, isuka kuR148,9bn wangonyaka Juni wangonyaka odlule.
Izibalo zenyanga nenyanga zikhombisa ukuthi izimpahla ezidayisa ngaphandle zinyuke ngo-4,3%, okuwuR8,8bn, zisuka kuR185,6bn ngoMeyi, zaya kuR193,6bn ngoJuni.
Izimpahla ezingenayo zehle ngoR5,3bn noma u-2,9% zisuka kuR181,2bn zaya kuR175,8bn ngesikhathi esifanayo.
Imali engenile ikhushulwe ukudayisa izithelo kakhuli ezisemndenini wama-orintshi, i-iron ore nezimoto. Ukwehla kwezimpahla ezithengwa kwamanye amazwe kudalwe wukwehla kokuthenga ama-petroleum oil okungathinti u-woyela ongahluziwe namabhanoyi. Imali engene ngohwebo ngoMeyi yehle ngoR1,8bn, yasuka kuR6,2bn yawuR4,4bn.