Usihlalo wePublic Investment Corporation usule isigubhukane
WUBONISWA MOHALE
ZIYANDA izinkinga zenkampani kahulumeni etshala imali iPublic Investment Corporation (iPIC) njengoba izolo kusule usihlalo webhodi noyiphini likangqongqoshe womNyango weziMali uDkt uDavid Masondo.
I-PIC yinkampani ephethe imali yempesheni yezisebenzi zikahulumeni nenezimpahla ezilinganiselwa kuR3,6 trillion. UMasondo usule ngaphambi komhlangano phakathi kwebhodi nomnikazi wenkampani uhulumeni, omelwe wungqongqoshe womNyango weziMali uMnu u-Enoch Godongwana, ozobangesonto elizayo.
UMasondo uthe wehla esikhundleni ukubeka izwe phambili futhi ufuna isimo sibuyele kwesijwayelekile ePIC nokuthi ababekelwe imali yomhlakaphansi bayithembe.
FUNDA NALAPHA: https://www.umbele.co.za/2026/07/20/usihlalo-webhodi-yepublic-investment-corporation-uxoxe-nezisebenzi/
Sekusule abaqondisi abayisithupha bebhodi njengoba sekusula uMasondo. Esitatimendeni esithunyelelwe abezindaba sekusondele ihora lamabili, uthe yize esula kodwa ufuna luqhubeke uphenyo ngokungaphathi kahle nezinye izinsolo ezibekwe iPIC.
Izinto ziqale ukushuba ePIC ngemva kokuthi kumiswe isikhulu esiphezulu uMnu uPatrick Dlamini nebamba le-chief investment officer uMnu u-August van Heerden ngemva kokuvela kwezinsolo ezithinta ukukhokhwa kukaR411 million enkampanini enamasheya esikhumulweni sezindizi esizimele saseGauteng iLanseria ebizwa nge-Acapulco Trade and Investment.
Kuthiwa eminyakeni eyishumi edlule ngathi kukhona imithetho yokuphatha izimali engalandelwanga kahle ngesikhathi iPIC itshala imali eLanseria.
UMasondo uthe uphenyo ngodaba lwaseLanseria kufanele luqhubeke. Kuvela nokuthi uDlamini usenikele enkantolo emva kokuthola ukuthi usemisiwe emsebenzini emibikweni yabezindaba.
Udaba lwakhe luzongena enkantolo ngesonto elizayo. Umlawuli wemboni yezimali iFinancial Sector Conduct Authority uthe uyalubheka udaba lwePIC.