Ludala imisebenzi emphakathini uhlelo lokubhaka lukamasipala
YINTATHELI KAMASIPALA
IBHIKAWOZI eliqalwe ngabantu ababili ababebhaka emizini yabo i-The Bread Army Bakery Cooperative eseZwelibomvu ngaKwaNdengezi, eThekwini, isiyibhizinisi eliphumelelayo.
Selinezisebenzi eziyisikhombisa ezisebenza ngokugcwele futhi lidayise izinkwa, amakhekhe neminye imibhako emphakathini. Liwubufakazi bokuthi uhlelo lukamasipala i-eThekwini Municipality Community Container Bakeries Programme lufukula umphakathi.
Lolu hlelo, oluqale ngo-Ephreli wango-2019, luletha ibhikawozi eyi-container enazo zonke izinsizakusebenza ezidingeka ebhizinisini lokubhaka. Amabhizinisi alutholayo ayimifelandawonye njengoba luhlose ukufukula umnotho wendawo, ukwakha amathuba emisebenzi yesikhathi eside, ukuqinisekisa ukuthi kunokudla emalokishini nasezindaweni ezisemakhaya.
FUNDA NALAPHA: https://www.umbele.co.za/2024/09/30/ibhikawozi-iyisibani-emphakathini-ontulayo/
Seloku lwaqala, umasipala usutshale uR28 million, uhambisa ingqalasizinda yamabhikawozi engaphezu kwawu-30 ezindaweni ezihlukene zaseThekwini. Abahlomulayo bathola imishini yokusebenza, usizo lokuqinisekisa ukuthi bayaphumelela nokuqeqeshwa.
Kuzekube manje sekudaleke imisebenzi ewu-222 yabantu abasebenza ngokugcwele kumabhizinisi ayimifelandawonye yalolu hlelo.
Ohhavini besimanje ehlomule ngabo iThe Bread Army Cooperative Bakery
Ngaphezu kwale misebenzi kudaleke eminye ewu-300 engamatoho emiphakathini okusuke kuzofakwa amabhikawozi kuyona. Lena yimisebenzi yokwakha, eyokuxhuma amapayipi ahambisa amanzi, eyokupenda neyenye ingqalasizinda.
Ngonyaka wezimali wango-2025/26 kwenziwe amabhikawozi angama-container ayisiphutha eNewlands West, kwaD eMlaza, eWelbedacht, eMagabheni, eHammarsdale naseNtshongweni. Kuhlelwe amanye amabhikawozi amathathu ngonyaka wezimali wango-2026/26 azoba KwaNyuswa, eDassenhoek naseNanda, ukwandisa amathuba kweminye imiphakathi.
Elinye ibhizinisi eliphumelelayo elikulolu hlelo yiThe Bread Army Cooperative oku-ward 100, eZwelibomvu. Ivule ngoMashi wonyaka odlule, isikhulile.
UMnu uKhaya Nyawo weThe Bread Army Cooperative Bakery uthe: “Siqale sibabili sisebenzisa isitofu sasekhaya, manje siqashe abantu abayisikhombisa. Sidayisa izinkwa nokunye okubhakiwe emphakathini wangakithi. Ukukhula kwethu kwenziwa wukuthi umasipala usixhase nge-container ehlukaniswe kathathu nemishini esiyidingayo ukusebenza. Sithole nezithako zokubhaka, amanzi, saxhunyelwa nogesi osize ukuthi sisheshe siqale ukuhweba. Sesifuna ukuyohweba nakwezinye izindawo ukuze sidale amanye amathuba omsebenzi.”
Lo mfelandawonye uthole ibhikawozi enohhavini omkhulu okhiqiza olofu abawu-900 bezinkwa, uhhavini ogcina inhlama isesimweni esifanele i-proofer, umshini ohlanganisa inhlama, ohlanganisa inhlama yamakhekhe, osika izinkwa, usinki omkhulu wezimboni, amatafula okusebenza, amafriji amakhulu, indawo yokudayisa, eyokugcina ukudla, ithangi eligcina amanzi amalitha awu-5 000 amanzi, izipuni namaphini okubhaka nezinye izinsiza. Umasipala uphinde wakhipha usizo olubiza uR25 000 olunezithako zokubhaka, amanzi nogesi oxhumeke izigaba ezintathu.
Usihlalo weKomiti lokuThuthukisa umNotho nokuHlela kuMasipala waseThekwini uMnu uThembo Ntuli uthe: “Lolu hlelo luyaqhubeka nokukhombisa ukuthi ukutshala imali emabhizinisi amancane kudala imisebenzi yesikhathi eside, kukhulisa umnotho wasemalokishini, kudala imisebenzi futhi kuletha ithemba emiphakathini yaseThekwini.”