Kucijwe abafundi abawu-500 ohlelweni lwentsha
INTATHELI KAMASIPALA
UMASIPALA waseThekwini ubeke ukuhlomisa intsha ngokomnotho eqhulwini emigubhweni yeNyanga yeNtsha ne-Africa Day, lapho bekukhona abafundi abangaphezu kwabawu-500.
Lo mcimbi wethule izinhlelo zokuxhasa ngezimali, ukuqeqesha nokuseka amabhizinisi, okuhloswe ngazo ukwakha isizukulwane sangomuso sosomabhizinisi abasebasha nabadali bamathuba omsebenzi.
Lolu hlelo, obeluseDurban City Hall izolo luqhakambisa izindlela zokuthuthukisa intsha, okuhlanganisa ukuseka osomabhizinisi ngendlela ehlelekile, usizo kwezemfundo namathuba axhaswe ngezimali ahloselwe ukwandisa ukubamba iqhaza kwentsha emnothweni.
Ithula inkulumo yosuku, iMeya yeTheku, uMnu uCyril Xaba, ithe lo mgubho ukhombisa ukubheka amagugu amadala nokutshala imali ngendlela ephathekayo ekuthuthukiseni intsha.
“Namuhla, njengoba sihlangene eCity Hall. Sizwa umoya ovuthayo wentsha yethu futhi sigubha amandla obu-Afrika. INyanga yeNtsha isikhumbuza ngesibindi nokuzinikela kwentsha eyasiza ukwakha intando yabantu yethu kanti i-Africa Day isibizela ebunyeni, ekuzigqajeni nasekuthuthukeni ngokubambisana ezwenikazi lethu.
“SiwuMasipala waseThekwini, sizibophezele ekuhlomiseni intsha yethu ukuthi ibesekhaleni lokuqamba izinto ezintsha, ubuholi nentuthuko efakq wonke umuntu,” kusho imeya.
FUNDA NALAPHA: Ukuqeqesha osomabhizinisi abancane embonini yegesi kudala imisebenzi
Usihlalo weKomiti lokuPhatha nezakwaNdabazantu, uKhansela uNkosenhle Madlala, uchaze ngezinhlelo ezisemqoka zokuhlomisa intsha zikamasipala.
“Ukuhlomisa abantu ngokomnotho kusaloku kumqoka kithina. Uhlelo lwethu i-Back-to-School Programme ne-Student Relief Fund kuzoqhubeka nangonyaka wezimali ozayo ukuze kuxhaswe abafundi nezitshudeni ezikhungweni zemfundo ephakeme abadinga usizo,” kusho yena.
Ubalule i-Youth Month Business Challenge kaMasipala, osomabhizinisi abasebasha amabhizinisi abo asesebenze ngaphezu konyaka.
Lolu hlelo luhlinzeka ngosizo oluhlelekile, lapho osomabhizinisi abathathu abavelele bethola izinsiza zebhizinisi ezibiza cishe uR70 000 sebebonke, kanti abanye abawu-17 babelana ngezinsiza ezicela kuR170 000.
Abafundi bathole ithuba lokuxhumana ngqo nabaphathi bakamasipala, lapho becobelelane ngezinto abazibona zibalulekile nezifiso zabo ngokuthuthukisa intsha.
Phakathi kweziphakamiso ezisemqoka kubalwe ukuthuthukiswa kokutholakala kwe-Wi-Fi yamahhala, ukwandisa amathuba emisebenzi nokusebenzisa isikhathi sesikole kangcono kusekelwe ukukhiqiza nokuzithuthukisa komuntu ngamunye.
Umfundi ka-Grade 12 uNokwanda Nxumalo, wase-Umqhawe High School eNanda, uthe lolu hlelo lumkhuthazile futhi luhambisana nezifiso zakhe zekusasa.
“Lolu hlelo lubewusizo kakhulu kimina, njengoba ngifisa ukufundisa ezobuciko,” kusho yena.
Lo mcimbi uphethe ngokuklomelisa abafundi abahlanu ngama-iPad, ngemva kokubamba iqhaza emncintiswaneni wokuxoxa nemeya ngezinto ezibalulekile ekuthuthukiseni intsha.