Kwethulwe umbiko ngezingozi zabathengi
YINTATHELI YOMBELE
KUNEZINTO ezine ezithinta abathengi baseNingizimu Afrika okufanele umlawuli wemboni yezimali, iFinancial Sector Conduct Authority (iFSCA) azibeke eqhulwini ukuvikela abathengi.
Loku wubuchwepheshe i-artificial intelligence, izindlela zokukhokha namabhizinisi amancane, umthethosivivinyo ogxile ekufundiseni abathengi i-Consumer Education and the Conduct of Financial Institutions (i-COFI) Bill nomshwalense wezikweletu nohlelo lokusiza abathengi abacwile ezikweletini.
Usho kanje umbiko wethimba iFSCA Consumer Advisory Panel eliluleka lo mlawuli. Lo mbiko osanda kuthulwa ungowokuqala kusukela lahlanganiswa leli komiti ngo-2023.
Leli thimba elibunjwe ngongoti abahlukene emkhakheni wezimali, ezamabhizinisi, ezomthetho nabezindaba belingakaze liwuthule umbiko kusukela laqala lo msebenzi.
Abanye balaba bantu wuMnu uBrendan Pearce, isikhulu esiphezulu seFinmark Trust, inhlangano engenzi inzuzo ehlose ukwenza imboni yezimali icabangele abantu abahlwempu futhi iqinisekise ukuthi babamba iqhaza, noNks uMagauta Mphahlele, isikhulu esiphezulu seSouth African Credit and Risk Reporting Association, inhlangano egqugquzela ukuthi kungabiwabudedengu uma kubolekwa abantu imali, uMnu uLyndwill Clarke wophiko olufundisa abathengi kwiFSCA, uMnu uThulani Njapha webhodi yeTownship Financial Services, eyingxenye yeTownship Commission of South Africa, noNks uWendy Knowler, intatheli yezabathengi emnkantshubomvu nabanye.
FUNDA NALAPHA: https://www.umbele.co.za/2026/01/27/i-fsca-ixwayisa-ngamaqola-azenza-yona/
Usihlalo waleli komiti uNks uDiane Terblanche, owummel, uthe umsebenzi wabo wutshengisa ukuzibophezela kweFSCA ekubeniwumlawuli wemboni yezimali oqinisekisa ukuthi wonke umuntu ubamba iqhaza futhi ozisukumelayo izinto ezihlupha abathengi.
“Umsebenzi wethu wukuhlanganisa abathengi nomlawuli nokulwela ukuthi yonke into eyenziwayo embonini yezimali ihlala obala kuwo wonke umuntu. Kusukela siqalile sesiqinisekisile ukuthi sifaka isandla ngendlela ebonakalayo emsebenzini weFSCA kanti sijabule ngenqubekelaphambili esibekhona. Siyaziqhenya ngomsebenzi wethu futhi sinethemba lokuthi umsebenzi wethu uzokwenza abantu bayithembe imboni yezimali,” kusho yena.
Leli komiti lihlanganiswe ngokwesiGaba 283 somthetho i-Financial Sector Regulation Act wango-2017. Enye yezinto leli komiti elifake isandla emsebenzini weFSCA kuyona wumsebenzi othinta i-Draft Consumer Education Standard, i-Statement on Consumer Vulnerability nabantu abaluleka abathengi ngezimali ezinkundleni zokuxhumana nabalandelwa ngabantu abaningi.