UMasipala uqoqe inzalo ewuR99 million kubantu abawukweletayo 

YINTATHELI KAMASIPALA 

UMASIPALA waseThekwini ubika ukuthi uqede unyaka usesimweni esihle sezimali ngenxa yokuqoqa izikweletu. 

Esitatimendeni esithunyelwe wumasipala, imeya ithi umasipala ukwaze ukunyusa izinga lokuqoqa izikweletu ngo-93% kubantu naseminyangweni kahulumeni abawukweletayo .

Loku kwenze ukuthi udlule isilinganiso sawo sokuqoqa izikweletu okulindele ukuthi sibewuR29 million ngenyanga, saba wuR99m, inzalo eqoqwe ngoDisemba. Isiyonke imali oyiqoqile ngezikweletu kubalwa nenzalo ibewuR549m.

FUNDA NALAPHA: https://www.umbele.co.za/2025/04/04/isabelomali-sasethekwini-sango-2025-26-sibeka-eqhulwini-izidingo-zabantu/

Umasipala uqede unyaka unemali ephakathi kwangoR5.8 billion noR5.9bn. Imali eqoqwe ngamanzi ibewuR256m. Le mali izosebenza ukulungisa ingqalasizinda yamanzi kamasipala. 

Abanikazi bemizi nabamabhilidi bazothola ithuba lokuphawula ngenani lokubiza kwemizi nezakhiwo zabo njengoba umasipala uzofaka isaziso ngomhlaka-12 wangoFebhuwari. 

Umasipala uthi uyalulungisa udaba lokumoseka kwamanzi ngenxa yamapayipi avuzayo njengoba kunomsebenzi oqhubekayo wokuwalungisa eThekwini namaphethelo. 

Kulindeleke ukuthi lezi zinhlelo ziqinisekise ukuthi ukuhambisa amanzi kuzo zonke izindawo zaseThekwini akuphazamiseki.