UMasipala waseThekwini ushintsha ukubukeka kwebhishi ngendawo entsha yokungcebeleka
YINTATHELI KAMASIPALA
UMASIPALA waseThekwini uthule izinhlelo ezizoshintsha ukubukeka kwendawo yasebhishi ngoLwesithathu, njengoba sekuzobanepaki enemishini ehlukene yokujabulisa abavakashela olwandle.
Le paki izobizwa ngeDurban Amusement Park kanti izobalapho kwakuneDurban Fun World khona. Izokwakhiwa ngoR1 billion kanti umsebenzi wokuyakha uzophela ngo-2027.
Umsebenzi wokuyakha wenziwa yiMasithu Consulting and Project Managers, inkampani yabantu abamnyama eneminyaka ewu-17 embonini yokwakha ingqalasizinda emadolobheni.
Kuzodaleka imisebenzi ewu-900 uma le ndawo isiyakhiwa newu-500 yabantu abazoqashwa ngokugcwele uma isisebenza.
Imeya kaMasipala waseThekwini uMnu uCryil Xaba ithe izinhlelo zokuheha izivakashi ziyaqhubeka njengoba sekuzoba nale paki.
“Siyabuthakasela ubudlelwano bethu nemboni ezimele njengoba kuzobanengqalasizinda ezoshintsha ibhishi. Lolu hlelo luzoqinisekisa ukuthi eThekwini siheha izivakashi ezithanda ukujabula olwandle ezisuke zizele isimo sezulu esifudumele eThekwini,” kusho yena.
FUNDA NALAPHA: https://www.umbele.co.za/2025/07/31/umasipala-wasethekwini-ubeke-ur9-million-ukulungisa-izakhiwo-ezindala/
Uthe ngeke ihehe nje izivakashi zaseNingizimu Afrika kuphela kodwa nezakwamanye amazwe emhlabeni, izofukula umnotho, ihehe abatshalimali futhi iyingxenye yezinhlelo zabo zokuvuselela ukubukeka kwendawo yasolwandle. Izoqinisa nobudlelwano phakathi kukamasipala nemboni ezimele.
Phakathi kwemishini yokudlala ewu-160 ezobakhona kubalwa i-lightning roller coaster, i-disko 24, i-vertical swing, ipaki yobuchwepheshe be-virtual reality ewu-1 500m2 nemidlalo edlalwa ngamakhompyutha ebizwa nge-e-sports.
Umsebenzi wale paki uzokwenziwa ngokubambisana nezinkampani zobunjiniyela zase-Italy ezidume ngokwakha iFerrari World, i-Universal Studios neDisneyland.
Kulindeleke ukuthi iDurban Amusement Park ihehe izivakashi imini nobusuku eThekwini nasolwandle njengoba inezindlela zokuhamba eziphephile ezizokwenza kubemnandi ukuhamba ebusuku.
Izoba nezindawo zokubuka idolobha lonke ezikhangayo nezindawo ezihlukene zokudla nezokujabula.
Kulindeleke ukuthi ithokozise wonke umuntu kusukela ezinganeni kuya kwabadala futhi kuzobanendawo engabuvumeli utshwala eyenzelwe imindeni, ukuphepha nokujabula komndeni wonke.
Izinhlelo zokwakha zizoqala uma sekuphothulwe izinhlelo zomthetho ezihambisana nokwakha ingqalasizinda yalolu hlobo. Umasipala nenkampani engamele umsebenzi izoloku yazisa umphakathi ngokuqhubekayo.