I-Sars ibuyisele abakhokhintela izigidigidi
YINTATHELI YOMBELE
ABAKHOKHINTELA abenzelwe ama-auto assessment, okusho ukuthi akudingeki ukuthi bathumele imininingwane yabo yentela eSouth African Revenue Service (iSars) ngoba ikhona, kulo nyaka bawu-5.8 million.
Lezi zindaba zivele ngoLwesihlanu ngesikhathi iSars imemezela ukuthi isisiqedile isigaba sokuqala sokuqoqa intela i-auto assessment, esiqale ngomhlaka-7, saphela ngomhlaka-20 wale nyanga.
Ithe u-99,6% wabantu abenziwe ama-auto assessment akukho abakuphikisile ezindabeni zabo zentela.
Abenziwe ama-auto assessment babuyelwe wuR10.6 billion futhi imali ibingena kuma-akhawunti abo kungakapheli amahora awu-72.
FUNDA NALAPHA: https://www.umbele.co.za/2025/07/11/siqalile-isikhathi-sokuqoqa-intela/
Ukhomishana weSars uMnu u-Edward Kieswetter uyithakasele indlela ahambe ngayo ama-auto assessment.
“Sisebenza kanzima ukuqinisekisa ukuthi abakhokhintela baphatheka kahle futhi senza impilo yabo ibelula uma bethumela yonke imininingwane yabo. Njengoba sesiwaqedile ama-auto assessment, ngicela abakhokhintela bathumele imininingwane yabo besebenzisa izindlela zethu zobuchwepheshe kusukela ngomhlaka-21 Julayi,” kusho yena.
Abakhokhintela abadinga ukulungisa imininingwane yabo noma ngabe benzelwe i-auto assessment kufanele bangene kwi-eFiling noma kwi-app yeSars.
Kuthiwa bangaphezu kuka-2.1m abakhokhintela asebethinte iSars ngobuchwepheshe. Abawu-707 000 bebengena kuWhatsapp, abawu-290 000 bebekhuluma ne-chat bot yakhona uLwazi, okuyirobhothi losizo.
Kusukela ngomhlaka-4 Julayi bawu-10.2m abakhokhintela asebengene kwi-eFiling nakwi-app yeSars.
Kusukela namhlanje kuzekubewu-Okthoba 20 abakhokhintela abangenziwanga i-auto assessment bangaqala bafake imininingwane yabo yentela nge-eFiling noma besebenzisa i-app yeSars.
Abakhokhintela ababizwa ngama-provisional taxpayer, okungabantu abathola enye imali ngaphandle komholo, okungaba yimali yemiqasho noma abazisebenzayo, bayakwazi ukufaka imininingwane yabo yentela kusukela namhlanje kuzekube wumhlaka-19 wangoJanuwari wonyaka ozayo
Abathumela imininingwane yabo online bakwazi ukuthola imiphumela ngemizuzwana emihlanu.
Ukugwema ukukhokha inhlawulo iSars icele abantu ukuthi bathumele imininingwane eyiqiniso besebenzisa lezi zindlela: i-website ethi www.sars.gov.za.
Bangabuza imibuzo ngokungena ku-https://tools.sars.gov.za/soqs, bakwazi ukukhuluma nezisebenzi zeSars ngokubingelela bathi “Hi” noma “Hello” ku-0800 117 277. Likhona nerobhoti eliphendula imibuzo imini nobusuku kwi-website yeSars. Bangashayela ku: *134*7277# ukuthola eminye imininingwane.
Bangangena nasekhasini YouTube weSars @sarstax ukubuka ama-video abachazela okufanele bakwenze.
I-Sars ithe asikho isidingo sokuya egatsheni layo kodwa uma kufanele icela abantu babekise indawo ukuze bangami kolayini abade.
Abakweletayo bacelwe ukuthi bakhokhe noma benze uhlelo lokukhokha ngokushesha. Imali ebuyayo engaphezu kukaR100 futhi ingena kuma-akhawunti asebhange abakhokhintela.
Abakhokhintela baxwayiswa ngamaqola. Bacelwa ukuthi bahlale beqaphile futhi banganiki noma wubani imininingwane yabo eyimfihlo.