Kuhlangene imboni yokuvakasha ukufukula umnotho waseThekwini
INTATHELI KAMASIPALA
EMIZAMWENI yokuvuselela ezokuvakasha eThekwini, abemboni yokuvakasha bebehlangene ukuza namacebo azofukula imboni.
Kulo mhlangano obuse-AHA Gateway Hotel eMhlanga, eThekwini, ubuholwa yithimba elivela emNyangweni wokuVakasha bekhona abemboni yokuvakasha ezimele, okukhona kubo abamahhotela, abemikhumbi ehambisa izivakashi, amaphoyisa, izisebenzi zikahulumeni nezazi zemvelo.
Umqondisi-jikelele womNyango wokuVakasha uMnu uVictor Vele uthe ukuze ezokuvakasha zikhule unomphela eThekwini kufanele kubenokusebenzisana phakathi kukahulumeni nemboni ezimele.
FUNDA NALAPHA: https://www.umbele.co.za/2025/05/23/i-africas-travel-indaba-ingenise-ur547-million-ethekwini/
Umqondisi woPhiko lokuHlela kuMasipala waseThekwini uMnu uLihle Phewa ugcizelele ukuthi umasipala uzibophezele ukusebenzisana nazo zonke izinhlaka.
“Asikwazi ukukhulisa le mboni sisodwa. Izinkampani ezizimele nabantu abanemikhiqizo yezokuvakasha kufanele babeyingxenye yalolu hambo ukuze siqinisekise ukuthi iTheku liyaphakama liyindawo evelele.”
Umqondisi weMSC Cruises uMnu uRoss Volk uncome ukusebenzisana okukhona phakathi kwemboni nohulumeni. Uthe ukusebenzisana kahle kwenza ukungcebeleka komkhumbi kuhambe phambili eThekwini.
U-Volk uthe iMSC izibophezele ukusiza imboni ukuze ikhule, ikakhulu endaweni yokulungisa ingqalasizinda eThekwini, ezokuthutha nokuphepha endaweni okugitshelwa imikhumbi yokungcebeleka kuyo, iNelson Mandela Cruise Terminal. Uthe bazobuye basebenzisane nama-tour operator aseThekwini namaphethelelo enza umsebenzi ngendlela efanele.
Imenenja eyengamele iziNdaba zokuGuquguquka kweSimo seZulu kwiSouth African Local Government Association uMnu uRabelani Tshikalanke uthe omasipala benza konke okusemandleni ukubanamakhono nengqalasizinda ezomelana nokuguquguquka kwesimo sezulu futhi abafuni siphazamise imboni yokuvakasha.
Usomaqhinga omkhulu weSouth African Tourism uMnu uSiyabonga Mthethwa uthe ngo-Ephreli kufike izivakashi eziwu-168 000 ezweni, ezisebenzise imali ezitolo zithenga izimpahla ezihlukene, zizikhipha ziyodla futhi zinethezekile emahhotela.
Uthe izivakashi ezivela eMozambique, e-United Kingdom naseMelika zisebenzise imali ethe xaxa kulo nyaka uma kuqhathaniswa neziyisebenzise ngodlule.