Ukhamba lufuze imbiza kumlimi omncane ophatha umhlabathi ngothando
WUTHOBILE ZWANE
UMHLABATHI uhlale ukhumbula ukuthi wubani owuthinta ngothando. Usho kanje umlimi waseBushbuckridge, eMpumalanga.
UMnu uKagiso Malope, oneminyaka ewu-22, wasungula iKgakgara Holdings Farming eneminyaka ewu-19 egqugquzelwa ngabazali bakhe ababezilimela epulazini labo ababengalibhalisile njengebhizinisi. Uthi uKgakgara yisithakazelo sakhe, okusho ifa lomndeni.
FUNDA NALAPHA: https://www.umbele.co.za/2025/01/21/umlimi-omncane-ulwa-nokuguquguquka-kwesimo-sezulu/
Epulazini lakhe bakhiqiza u-anyanisi, isipinashi, utamatisi neklabishi. “Okusenza sihluke wukuzibophezela kwethu ukwenza umsebenzi osezingeni eliphezulu futhi siziqhenya ngokuletha umkhiqizo omuhle kumakhasimende ethu. Silwela ukwakha ubudlelwano obuqinile namakhasimende ethu,” kusho yena. Amakhasimende akhe amakhulu yizimakethe nabantu bendawo.
Into ayithanda ngebhizinisi lakhe wumuzwa wokuphelela nokukhula okwenziwa wukulima nokuzisebenza. Uthi kuyamjabulisa ukubona umphumela wokuzikhandla kwakhe emhlabeni nasemphakathini.
“Enye yezinselelo ezinkulu engibhekana nazo wukushintsha kwezinto kule mboni yezolimo nokuqinisekisa ukuthi umkhiqizo usezingeni eliphezulu ngaso sonke isikhathi,” kusho uMalope.
Unezisebenzi eziwu-22, okubalwa umndeni wakhe nabantu bendawo yangakubo.
Ululeka abafisa ukuqala ibhizinisi ukuthi basebenzise amathuba abawatholayo ukwenza abakuthandayo. Uthi uma befuna ukukhula kufanele bayeke okwenza banethezeke kodwa basebenze ngokuzikhandla kwabakholelwa kukhona nasemakhonweni abo.
“(Ngifisa) ukwandisa amandla okukhiqiza epulazini lami, ukuhlukanisa izitshalo zami nokuhlola izimakethe ezintsha. Ngingathanda ukwandisa izisebenzi zami futhi ngifake isandla emnothweni wendawo,” kusho uMalope.
Facebook: Kgakgara Holdings farming
Tiktok: Kgakgara Holdings farming