Zikhwele kuNksz uMoahloli eNew Development Bank

YINTATHELI YOMBELE 

OBEYIPHINI lomqondisi-jikelele eHhovisi lomGcinimafa emNyangweni weziMali eqondene ne i-Asset and Liability Management, uya eNew Development Bank (iNDB) ukuyobawumqondisi-jikelele we-Africa Regional Centre. 

UNksz uTshepiso Moahloli ubephambili kubantu abasiza izwe ukulungisa izindaba zezikweletu futhi kuwuye obephethe ezokuxhumana nezinhlaka ezifanele eHhovisi lomGcinimafa waseNingizimu Afrika.

FUNDA NALAPHA: https://www.umbele.co.za/2024/10/25/umgcinimafa-uyoshela-abatshalimali-phesheya/

Esitatimendeni esithunyelwe yiHhovisi lomGcinimafa inhloko yalo uDkt uDuncan Pieterse uthe uNks uMoahloli uqale umsebenzi wakhe ngomhlaka-20 wangoJuni. 

Uzogxila ezinhlelweni zentuthuko ezenziwa e-Afrika yonkana, kusukela lusasungulwa uhlelo, lulungiselelwa futhi noma selwenziwa uzobe eluqaphile. Uyena ozoxhumanisa iNDB nezinhlaka ezihlukene esifundeni. 

I-NDB igubha iminyaka eyishumi isebenza seloku yasungulwa ngo-2015, isigunyaze izinhlelo zengqalasizinda eziwu-15 eNingizimu Afrika ezibiza u$7.3 billion, ezihlose ukulungisa ingqalasizinda yamanzi, eyamandla (ekagesi) ezokuthutha kwezimpahla.

IHhovisi lomGcinimafa lithe ngaphambi kokuthi uNks uMoahloli aqokwe esikhundleni sakhe esisha ubelilekelela ekulungiseni isikweletu sezwe, ukufaka izicelo eziqhakambisa ukuguquguquka kwesimo sezulu nokulungisa ingqalasizinda. Ubelinika ubuchule nasekusunguleni i-Oman Debt Management Office. 

Ubebuye asebenzisane neWorld Bank ukusiza iNDB ukuthi ihlelele iHhovisi lomGcinimafa okufanele likwenze ukulungisa ingqalasizinda yezwe.

Une-Master of Business Administration in Executive Management azithola e-University of Cape Town ne-Master of Commerce Economic Science, aziphasa ngamalengiso e-University of Witwatersrand. 

U-Pieterse, omele iNingizimu Afrika ebhodini leNDB, ufisele uNks uMoahloli okuhle kodwa emsebenzini wakhe wokwandisa izinhlelo zeNDB ezinemiphumela emihle e-Afrika yonkana.