INingizimu Afrika iwumholi omusha wezifunda zezikhungo zentela
INTATHELI YOMBELE
UHAMBE kahle umhlangano obuphethwe yiSouth African Revenue Service (iSars) i-41st Regional Steering Group yeWorld Customs Organization (iWCO) East and Southern Africa ophele ngoLwesihlanu. Ubuqale ngoMsombuluko.
Umhlangano ubuyekeze izinto ezimqoka zonyaka wokubika u-2024-25, kwaphothulwa iqhinga lokusebenza i-East and Southern Regional Strategy (yango-2025 kuya ngo-2028). Kulo mhlangano abaqoqintela nabanye abalingani. Izithunywa zigcizelele ukuzibophezela ukushintsha, ukwakhana nokubambisana kwezifunda.
I-WCO iyisigcawu sokuthi amazwe ase-Afrika abambe iqhaza ezivumelwaneni zokuhweba emhlabeni jikelele. Ukwemukelwa kwe-African Continental Free Trade Area yigxathu elikhulu ekuhwebelaneni kwamazwe ase-Afrika.
Isihloko ebesiseqhulwini kubeyisivumelwano sokwenza kubelula ukuhwebelana i-Trade Facilitation Agreement, okuzonciphisa izingqinamaba zokuhweba nokusebenza.
Impumelelo yalesi sivumelwano ilele ekususeni izingqinamba zentela nokuthi kubelula ukweqa imingcele. Iphini likangqongqoshe womNyango weziMali eNingizimu Afrika uMnu u-Ashor Sarupen ubalulele ukuthi umoya wokuxhumana ngobuchwepheshe wenza kubelula ukufeza lezi zinjongo.
Unobhala-jikelele weWCO uMnu u-Ian Saunders ukhulume ngeqhaza leWCO ekutheni ekwenzeni izinqubo ezihambisana nezidingo zazo zonke izifunda. Uthe lo nyaka kuzobangowoshintsho endleleni i WCO eyenza izinto ngayo namalungu ayo.
Uphethe ngokuthi: “I-WCO izobophezele ekungafihlini lutho, ekungenzeni amaphutha nokuphendula ekufezeni isibopho sayo, ukuphepha nempumelelo.”
Ukhomishana weSars uMnu u-Edward Kieswetter ugcizelele ukubaluleka kwesifunda i-East and Southern Africa, iqoqo lamazwe awu-24. Lesi sifunda sinokuthula, sicebile ngokwezinto ezimbiwayo kanti sinekusasa eliqhakazile. Impumelelo idinga ukuhlelelwa, ukucabanga ngezindlela ezintsha nokubambisana ukuze kusimame wonke amazwe.
Kule ngqungquthela kuqokwe iNingizimu Afrika ngo-elethu ukuthi ibeyiphini likasihlalo weWCO East and Southern Africa kusukela mhlaka-1 ngoJulayi. I-Madagascar iqokwe ukuthi ibeyisekela lephini likasihlalo, iKenya yabayilungu elengeziwe leWCO Policy Commission.