Ithuba lokukhangisa embukisweni iNorth Regional Durban Business Fair
INTATHELI YOMBELE
BHALISA manje ukuzikhangisa embukisweni wamabhizinisi iNorth Regional Durban Business Fair ozoba mhlaka-28 wangoMashi kuze kubemhlaka-30 eBridge City Shopping Centre KwaMashu, eThekwini.
Abafuna ukubayingxenye yalo mbukiso sebengaqala ukubhalisa njengoba kuvala mhlaka-14 wangoMashi.
Lo mbukiso yithuba lokuzikhangisa kosomabhizinisi basenyakatho yaseThekwini nabasondele kule ndawo.
Amafomu okubhalisela ukubayingxenye yombukiso, osomabhizinisi bangathatha amafomu emahhovisi ophiko olulekelela amabhizinisi eThekwini i-Business Support, ase-Embassy Building, 7th floor, ku-199 Anton Lembede Street, eThekwini.
Amafomu atholakala kunogada.
- Ayatholakala nakuwo wonke amahhovisi oSizakala aseThekwini namaphethelo;
- Abantu bangawathola nasemahhovisi eDurban Chamber of Commerce and Industry aku-101 Isaiah Ntshangase Road, eStamford Hill, eThekwini;
- Ayatholakala nangokuthumela i-email ucele ifomu ku-Zamani.Shezi@durban.gov.za
Osomabhizinisi bangabhalisa online ngokungena ku-http://bit.ly/NReg
Bangenza ne-download ukuze bathole ifomu kwi-website kaMasipala waseThekwini ethi www.durban.gov.za ngaphansi kwesihloko esithi Government bese becindezela esithi Documents, kulandele esithi Public Notices ukuthola amafomu.
Usihlalo weKomiti lokuThuthukisa umNotho nokuHlela kuMasipala waseThekwini, uMnu uThembo Ntuli uthe indikimba yalo nyaka yemibukiso yamabhizinisi ithi “Regional Fairs – Back to Promoting Township Businesses and Economies”.
Uthi ukwenza umbukiso wamabhizinisi KwaMashu, indawo esazama ukubuyela esimweni emva kwezibhelu zokutapa kuzokhangisa amabhizinisi endawo kusize nezinhlelo zokubuyisela umnotho esimweni.
FUNDA LAPHA: https://www.umbele.co.za/2024/10/28/itheku-lixhase-amabhizinisi-aselokishini-ngezenzo-ngedbf/
“Lo mbukiso ubalulekekile kakhulu kosomabhizinisi ukuzikhangisa, bakhe ubudlelwano, bakhuphue izimpahla abazidayisayo futhi bahehe namanye amakhasimende,” kusho uNtuli.
Ngaphezu kwaloko umbukiso unemincintiswano yokusimamisa amabhizinisi ezohlonyulwa abawuhambele. Uma sekuphela umbukiso wezinsuku ezintathu, osomabhizinisi abazobe benze izindawo zokuzikhangisa ezigqamile bazoklonyeliswa ngeminye imihlomulo ezobasiza ukukhula. Abanemibuzo bangashayela ku-031 311 4500 noma bathumelele i-email ku- zamani.shezi@durban.gov.za