Ithela izithelo imizamo yokunciphisa isinyokotho samaloli
YINTATHELI YOMBELE
UKUBAMBISANA phakathi kweTransnet nabanikazi bamaloli eDurban Container Terminal Pier 2 sekuphucule isikhathi amaloli asithathayo ukuthulula nokulayisha izimpahla ngo-24%.
Le nkampani kahulumeni ithe indlela entsha yokubhuka amaloli ukuze kulawuleke isinyokotho izoqhubeka ngenhloso yokuphucula indlela umsebenzi owenziwa ngayo.
FUNDA NALAPHA: https://www.umbele.co.za/2024/02/29/kwethulwe-abaholi-abasha-ukubuyisela-inqola-esipolweni-etransnet/
Isikhulu esiphezulu eDurban Terminals uMnu u-Eearle Peters sithe sebememezela izikhala ezikhona kusasele amahora awu-60 esikhundleni sosuku, indlela abebenza ngayo kuqala.
Uthe sebenendlela yokubheka nezikhalo zabamaloli abaphunyukwa yizikhala zawo njengoba sebekwazi ukuthi abike ngaphambi kwemizuzu ewu-30 uma ebona ukuthi ngeke asibambe isikhathi ababekelwe sona. Nokho-ke kukhona izinto abazozenza ukubhekana nabantu abahlale behluleka wukugcina isikhathi.
Le nkampani ibanomhlangano nabamaloli masonto onke nanjalo ngenyanga ukuxoxisana nokuxazulula ezinye izinselelo eziqhamukayo.
Khonamanjalo, imboni yezemikhiqizo yehle ngo-1.2% ngo-Agasti uma kuqhathaniswa no-Agasti ngonyaka odlule. I-Statistics South Africa (iStats SA) ithe izinto ezibenesandla kakhulu ekwehleni komkhiqizo yimboni yezimoto, izinsimbi zezimoto neminye imishini yezokuthutha, enciphe ngo-16.1%, eyokusansimbi, eyehle ngo-5.4%.
Imboni ebeneqhaza ekusimameni kube ngeyokudla neziphuzo ekhuphuke ngo-5.8%.
Izibalo zomkhiqizo wezimayini, ezishicilelwe kuleli sonto, ziveze ukuthi ukhuphuke ngo-0.3% ngo-Agasti. Onyuke kakhulu owe-manganese ngo-16.0%, ama-platinum group metal akhuphuke ngo-4.7% ne-chromium ore enyuke ngo-24.8%. Nokho, umkhiqizo we-iron ore wehle ngo-15.2%, kwathi owegolide wancipha ngo-4.6%.
- Lolu lwazi lucashunwe kwiTransnet neStats SA