AbaseThekwini bashela abatshalimali baseMelika
YINTATHELI YOMBELE
ABAHOLI baseThekwini banethemba lokuthi kuzovuleka amathuba amasha amabhizinisi ngenxa yezingxoxo ezihambe kahle phakathi kwabo nabatshalimali baseNew York, eMelika, okuhambisana nokulungiselela ingqungquthela ye-reSURGEnce.
Leli thimba beliholwa wusihlalo weKomiti lokuThuthukisa umNotho kuMasipala waseThekwini uMnu uThembo Ntuli nemenja kamasipala uMnu uMusa Mbhele.
Le ngqungquthela izoba se-Inkosi Albert Luthuli International Convention Centre ngenyanga ezayo.
Ekhuluma nabatshalimali, uMbhele uthe maningi amathuba akhona kuleli dolobha abatshalimali abangawasebenzisa.
“I-New York inesabelomali esiwu-$229 billion nezikhwama zempesheni ezingaphezu kuka-$1 trillion futhi ifuna ukuwasebenzisa wonke amathuba okutshala imali angaphandle kwasezweni lawo. Siyidolobha, sifisa ukuqinisa ukusebenzisana ukuze abatshalimali bakithi bakwazi ukusebenzisa amathuba aseMelika. Intshisekelo abatshalimali abanayo ngedolobha lethu isinika umfutho wokuqhubeka nemizamo yethu yokuvuselela,” kusho yena.
UMbhele uqhakambise ezinye izinhlelo ezikhona edolobheni njengomsebenzi wokukhulisa iDubeTradePort neWhetstone okutshalwe uR54bn kuyona nezizokwakha imisebenzi ewu-214 100. Ezinye yiKeystone Logistics Park eHammarsdale, iWestown eShongweni neDry Port eCato Ridge ezizofaka uR33bn entshonalanga yaseThekwini.
Kuzobe kuqala ukuthi ingqungquthela ye-reSURGEnce ibe se-Afrika. Ihlelwe wuMfundisi uDennis Dillion, umshicileli we-The New York Christian Times.