‘Beka imali ukuhlomela ikusasa’
Kuleli sonto kuSAZIWAYO NEMALI sixoxa noMbali Ngidi, umculi nomlingisi wemidlalo yeshashalazi. Kumanje ushisa izikhotha ngengoma ethi Xola Moya Wami ayishaya noDJ Mngadi, uGoonflavour no‘Mlindo The Vocalist’
WUSIMANGALISO NTSHANGASE
Usemncane wawuphiwa yini imali?
Yebo ngangiphiwa uma ikhona.
Waqala nini ukuba ne-akhawunti yasebhange kanti wayivula kuliphi?
Ngaqala sengiphothule uMatikuletsheni, ngayivula eCapitec.
Ekukhuleni kwakho, yini oyikhumbulayo nowayifunda ngemali?
Ngafunda ukuthi kumele uzijwayeze ukubeka imali ukusiza ukuhlomela isikhathi esinzima.
Waqala nini ukusebenza kanti kwakuyimalini umholo wakho wokuqala?
Ngaqala ngiwu-cashier eKFC ngo-2008, ngihola ngokwamahora engiwasebenzile.
Wawenzani umholo wakho wokuqala?
Ngathenga izimpahla zokugqoka ngawo.
Yini into enhle ongathi usuke wayenza ngemali?
Wukusiza ukunakekela umndeni wami, ngiwenzela okudingayo.
Yiliphi iphutha elithinta imali osuke walenza?
Alikho engilikhumbulayo.
Wake walutheka mhlawumbe ngokudlala ibhanoyi?
Cha, angikaze.
Yisiphi iseluleko esihle owasithola ngemali?
Esokuthi uma usebenza noma kunemali oyitholayo, zijwayeze ukuyibekela ukuyisebenzisa ngesikhathi esizayo.
Uma ungawina uR1 million kwiLotto ungawusebenzisa kanjani?
Ngingathatha ingxenye yayo nginikele ngayo ezinganeni eziswele bese esalayo ngiyisebenzisa ukunakekela umndeni wami, ngenze okushodayo ekhaya.
Ungabeluleka uthini abanye abasemkhakheni wakho ngokuphatha imali?
Ngokuthi abaqinisekise ukubeka nokonga imali, ikakhulu uma izinto zisabahambela kahle kule ndima ukusiza ukuhlomela isikhathi esizayo.
