Kuzojabula abanye kwehla ilitha kaphethroli, kukhale abanye kunyuka elikadizili
YINTATHELI YOMBELE
UZOKWEHLA umthwalo emahlombe abashayeli bezimoto zikaphethroli njengoba ilitha likaphethroli i-93 ne-95 lizokwehla ngo-52c kusasa. Abashayela izimoto ezihamba udizili bazokhokha njengoba ilitha izokhuphuka ngoR1,38 noR1,23.
UmNyango wokumBiwayo uthi ukukhuphuka kwelitha kadizili kudalwa wukukhuphuka kwamanani awo emhlabeni jikelele, ukuntenga kwerandi uma liqhathaniswa nedola laseMelika nokuqala phansi kwempi ye neMelika ne-Iran.
Le mpi isiphazamise ukuhambisa uwoyela ongahluziwe njengoba ivala umgudu ohamba imikhumbi ethwala uwoyela omningi iStrait of Hormuz ose-Iran.
Khonamanjalo, ucwaningo olusha lwenhlangano eyenza ucwaningo ngamanani okudla nesimo senhlalo iPietermaritzburg Economic Justice and Dignity Group (iPMBEDJ) luveza ukuthi ngenyanga edlule igrosa yomndeni ibibiza uR5 530,52.
FUNDA NALAPHA: https://www.umbele.co.za/2026/05/28/imindeni-yabahola-kancane-ayisakuthengi-ukudla-okwanele-ucwaningo/
I-PMBEJD yenza ucwaningo kubantu besifazane abathenga igrosa yomndeni eGauteng, KwaZulu-Natali, eMpumalanga Kapa, eNtshonalanga Kapa naseNyakatho Kapa.
Kuvela ukuthi ama-aphula anyuke ngo-6%, impuphu yanyuka ngo-4%, amafutha ngo-2%, usawoti ngo-3%, amaphisisi enkukhu ngo-2%, ama-stock cube anyuka ngo-3%, kwathi amaqanda anyuka ngo-3%, kunyuke ngisho inyama yangaphakathi njengoba usu lunyuke ngo-3% nokunye.
Okunye ukudla kwehlile, okukhona kukho ukherothi owehle ngo-15%, uflawa ngo-2%, u-anyanisi ngo-4%, isibindi senkomo ngo-2% nokunye.
Ucwaningo luthole ukuthi izisebenzi ezihola ngokwemiholo enqunywe wumthetho, okusho ukuthi zihola uR5 078,64, zisebenzisa uR3 471,45 ukukhokhela ugesi nokugibela.
Lezi zisebenzi zondla imindeni enabantu abane kuya phezulu, igrosa yomndeni enabantu abane ibiza uR3 848,97. Kusho ukuthi izisebenzi azinayo imali eyanele yokuthenga igrosa enomsoco.
Uma kubhekwa izingane nabantu besifazane, ucwaningo luthola ukuthi abantu besifazane abaningi abasebenzi, okusho ukuthi bondla izingane ngesibonelelo sikahulumeni esiwuR580. Abacwaningi bathi ukudla kwengane okunomsoco kuwuR980,66.
I-PMBEDJ ngenye yezinhlangano ezifuna uhulumeni unyuse izibonelelo ukuze abantu bakwazi ukuthenga ukudla okunomsoco ngesikhathi bsafuna imisebenzi.