Ziyaqhubeka izinhlelo zokuthola isisombululo eTongaat Hulett – Tau 

WUBONISWA MOHALE 

UNGQONGQOSHE womNyango wezoHwebo, iziMboni nokuNcintisana uMnu uParks Tau uthi bayaqhubeka nezinhlelo zokuqinisekisa ukuthi iTongaat Hulett ayivali njengoba befake uR200 million ukuqinisekisa ukuthi abahlenga ibhizinisi nenkampani kamacaphunakusale uMnu uRobert Gumede iVision Consortium bayavumelana ngezimali ezidingekayo ukuvuselela le nkampani. 

UTau ubeseRichards Bay, enyakatho yeKwaZulu-Natali, noshansela wendlukulu kaZulu uMnu uMalusi Zondi nongqongqoshe womNyango wezokuThutha KwaZulu-Natali uMnu uSiboniso Duma bedingida zindaba zomnotho ngoLwesihlanu.

“Sizoqinisekisa ukuthi iTongaat Hulett iyasebenza. Kubalulekile ukuthi zonke izinhlaka ezithintekayo zisebenzisane ukuthola isisombululo. Sifake imali ezosiza ukuthi le nkampani isebenze kuze kuphele uJuni. Loku sikwenzela ukuthi abahlenga ibhizinisi neVision Consortium bahlale phansi bavumelane ngodaba lwemali. Siyazi ukuthi umoba wabalimi uyagaywa, bekubalulekile kithina ukuthi lo msebenzi ungaphazamiseki,” kusho yena. 

Uthembise ukuthi kukhona isikhwama sokuguqula umnotho i-Transformation Fund esinoR100bn esizolekelela osozimboni abamnyama. 

FUNDA NALAPHA: Inkantolo imise izinhlelo zokuvala iTongaat-Hulett

UZondi uthe bayakuthakasela ukuthi uTau akaluyeki udaba lweTongaat Hulett ngoba abakwazi ukubuka kushabalala imboni kashukela esiza abalimi, efukula umnotho nesiza abantu abangaphezu kwango-1 million emakhaya.

Uthe akuthakasela kakhulu wukuthi uTau usazibheka nezisombululo ezizoqinisekisa ukuthi inkampani yensimbi i-Arcelormittal ayivali njengoba uhulumeni ufuna ukutshala uR8.5 billion kuyona. 

Icala lokumisa ukuvala iTongaat Hulett lizobuyela enkantolo ngomhlaka-17 no-18 wangoJuni.