Uzobamnandi uKhisimusi amakhasimende eThala ebuyelwa yimali
WUBONISWA MOHALE
IZIMALI zabantu ebezivaleleke eThala kusukela kuqala unyaka zizophuma maduze.
Usho kanje undunankulu waKwaZulu-Natali uMnu uThami Ntuli esithangamini nabezindaba emaHhovisi kaNdunankulu eThe Marine eThekwini, KwaZulu-Natali, namhlanje.
“Sekuphele izinyanga sizama ukuthola isixazululo odabeni lwemali yabantu ebhajwe eThala. Besixoxisana nomlawuli oqokwe yiBhange lomBuso siwuhulumeni waKwaZulu-Natali, saze sacela nokuthi kungenelele iHhovisi likaMengameli nomGcinimafa.
“Kuyintokozo ukusho namhlanje ukuthi imali ebivaleleke eThala izotholakala kungakashayi uKhisimusi,” kusho yena.
Uxolisile kumakhasimende, wabalula ukuthi ukuphazamiseka kokusebenza kweThala kuphazamise amabhizinisi, imindeni nezinye izinhlelo zabantu ebezenziwa ngabalondoloza imali kuleli bhange.
FUNDA NALAPHA: https://www.umbele.co.za/2025/08/20/inkantolo-iyalele-ithala-ukuthi-lisebenzisane-nomlawuli/
“Ithala nomlawuli weBhange lomBuso lizomemeza maduze ukuthi imali izokhishwa kanjani, kumaphi amagatsha futhi ngaziphi izinsuku. Kuzobanamathimba azoya ezindaweni zasemakhaya lapho Ithala linamakhasimende angaphezu kwawu-200 000 akade elondoloza imali kulo. Amathimba azolekelela abantu ukuthi bathole imali yabo,” kusho uNtuli.
Uthe bewuhulumeni wesifundazwe bafake uR300 million wokuqinisekisa ukuthi Ithala lisebenza kahle ukuze bavikele imali yabantu nemisebenzi yezisebenzi saseThala.
Ubalule nokuthi imininingwane yokuthi imali izokhishwa kanjani izobhalwa ngesiZulu nangesiNgisi, isatshalaliswe emagatsheni eThala, emazikweni ezindaba, ezinkundleni zokuxhumana nasemakhasini okuxhumana nomphakathi kahulumeni.
Unxuse abanemali eThala ukuthi baqaphe njengoba sekuphume lesi simemezelo, bangalaleli noma wubani kodwa balalele Ithala, umlawuli weBhange lomBuso, iHhovisi lomGcinimafa nelikandunankulu.
Uthe ayikho imali ekhokhwayo ukuze kuphume imali ebivalelelekile kanti konke kuzokwenziwa ngendlela ecacile.
Emva kwalesi sigaba uthe bazodlulela kwesilandelayo sokusebenza kweThala, bese bememezela ngesikhathi esifanele.
Ukhale ngokuthi izinkinga zeThala zaqala kudala bengakangeni kuhulumeni wobumbano kodwa ungqongqoshe womNyango woziMali KwaZulu-Natali uMnu uFrancois Rodgers nowomNyango wokuThuthukisa umNotho, ukuVakasha neMvelo KwaZulu-Natali uMfu uMusa Zondi bazamile ukuzixazulula njengoba manje abantu sebezothola imali.
Umbele uthumele imibuzo eThala naseBhange lomBuso ukuzwa ukuthi ziqala nini izinhlelo zokukhipha imali eThala kanti usalinde izimpendulo.