INKANTOLO isichithile isicelo seSakeliga ebifuna ukuphoqa umcwaningimabhuku-jikelele ukuthi adedele imininingwane yamabhuku omasipala abawu-154 ebizwa ngama-management report.
Le nhlangano engenzi inzuzo yayifake lesi sicelo isebenzisa umthetho ogqugquzela ukuthi kutholakale ulwazi, i-Promotion of Access to Information Act.
ISakeliga yathi ibingazi ukuthi kanti umcwaningimabhuku-jikelele usuke enanele mibiko enemininingwane ethe xaxa. Yathi ukushicilelwa kwayo kungasiza uma kukhona abantu abafisa ukuthathela omasipala izinyathelo zomthetho.
Inkantolo ithe ayikho into ekumthethosisekelo ephoqa ihhovisi lomcwaningimabhuku-jikelele ukuthi ashicilele ama-management report.
UmCwaningimabhuku-Jikelele uNksz uTsakani Maluleke ubeshaya phansi
ngonyawo ephikisa lesi sicelo ngoba ethi ama-management report anezinto eziyimfihlo eziphakathi kwehhovisi lakhe nabasuke bebacwaninga futhi inhloso yawo wukuvusa abaphathi balezo zindawo uma kukhona izinto ezisolisayo ukuze baphenye bezothatha izinyathelo ezifanele.